பதின்வயதினர் 10 பேரில் 9 பேர் வீடியோ கேமில்தான் அதிக நேரம் செலவிடுவதாக ஆய்வு முடிவு ஒன்றில் தெரிய வந்துள்ளது.
மிச்சிகன் பல்கலைக்கழக ஆராய்ச்சியாளர்கள் மேற்கொண்ட ஒரு ஆய்வில் 86 சதவீதம் பெற்றோர்கள், தங்களது குழந்தைகள் பெரும்பாலான நேரங்களை கேமிங்கில்தான் செலவழிப்பதாகத் தெரிவித்துள்ளனர்.
குழந்தைகள் உடல்நலம் குறித்து அமெரிக்காவில் உள்ள குழந்தைகள் நல மருத்துவமனை சார்பில் கருத்துக்கணிப்பு ஒன்று நடத்தப்பட்டது. அதில், குழந்தைகள் மற்ற விளையாட்டுகளை விட ஆன்லைன் விளையாட்டுகளில் நேரம் செலவிடுவதை விரும்புவதாக தெரிவிக்கப்பட்டுள்ளது. அதுமட்டுமின்றி, பதின்வயது பெண் குழந்தைகளை விட ஆண் குழந்தைகள் வித்தியாசமான பல்வேறு ஆன்லைன் வீடியோ கேம்களில் கவனம் செலுத்துவதாகவும், குறைந்தது தொடர்ந்து மூன்று மணி நேரங்கள் அதில் ஈடுபடுவதாகவும் பெற்றோர்கள் தெரிவிக்கின்றனர்.
கருத்துக்கணிப்பு நடத்திய மருத்துவமனையின் இணை இயக்குனரும், குழந்தைகள் நல மருத்துவருமான கேரி ஃப்ரீட் என்பவர் இதுகுறித்து கூறும்போது, 'வீடியோ கேம்கள் பதின்ம வயதினருக்கு நல்லது என்று பல பெற்றோர்கள் நம்புகிறார்கள். அதன் மூலமாக அவரது செயல்பாடு மேம்படுவதாக நினைக்கின்றனர். அதே நேரத்தில் குழந்தைகள் அதிக நேரம் வீடியோ கேமில் இருப்பதை பெற்றோர்கள் விரும்பவில்லை.
பதின்வயது குழந்தைகளின் நடவடிக்கையை பெற்றோர்கள் தொடர்ந்து கண்காணிக்க வேண்டும். தூக்கம், குடும்பத்தினருடன் நேரம் செலவிடுதல், பள்ளிகளில் குழந்தைகளின் செயல்திறன் ஆகியவை குறித்து பெற்றோர்கள் தொடர்ந்து கண்காணிப்பது அவசியம். குழந்தைகளின் செயல்பாடுகளுக்கு தீங்கு விளைவிக்கும் காரணிகளை தவிர்க்க முயற்சிக்க வேண்டும்' என்று கூறியுள்ளார்.
மேலும், பெற்றோர்களில் 54 சதவிகிதம் பேர் தங்களது பதின்வயது குழந்தைகள் நாள் ஒன்றுக்கு மூன்று அல்லது அதற்கு மேற்பட்ட மணிநேரம் வீடியோ கேமில் விளையாடுவதாக தெரிவிக்கின்றனர். தங்கள் குழந்தைகள் தினமும் விளையாடுவதில்லை; நேரம் இருக்கும்போது விளையாடுவதாக 13 சதவிகிதம் பெற்றோர்கள் கூறுகின்றனர்.
78 சதவிகிதம் பெற்றோர்கள், மற்ற குழந்தைகளை ஒப்பிடுகையில் தங்களது குழந்தைகள் குறைவான நேரத்தையே கேமிங்கில் செலவழிப்பதாகத் தெரிவிக்கின்றனர். அதிலும் சில பெற்றோர்கள், தங்கள் குழந்தைகள் ஆன்லைனில் நேரம் செலவிடுவதை மறைக்கின்றனர்.
அதுமட்டுமின்றி, ஆய்வில் கலந்துகொண்ட பெற்றோர்கள் தங்கள் குழந்தைகள் கேமிங்கில் செலவழிக்கும் நேரத்தைக் கட்டுப்படுத்த, பிற செயல்பாடுகளை ஊக்குவித்தல், நேர வரம்புகளை நிர்ணயித்தல், கேமிங்கைக் கட்டுப்படுத்த ஊக்கத்தொகை வழங்குதல் மற்றும் கேமிங் கருவிகளை மறைத்தல் உள்ளிட்ட பல உத்திகளை கையாள்கின்றனர் என்றும் அந்த ஆய்வில் தெரிவிக்கப்பட்டுள்ளது.