உடல்நலம் மற்றும் உடற்பயிற்சி தொடர்பான 'ஹெல்திஃபைமி'(HealthifyMe) என்ற மொபைல் செயலி நிறுவனம், தனது வாடிக்கையாளர்களுக்கு உடல்நலத்திற்கு ஏற்ற ஆரோக்கியமான உணவுகளை ஸ்விக்கியில் பரிந்துரைக்கிறது.
தில்லி, குர்கான், மும்பை மற்றும் பெங்களூரு நகரங்களில் உள்ளோர் மொபைல் செயலி மூலமாக ஸ்விக்கியில் பரிந்துரை செய்யப்பட்ட உணவகங்களில் இருந்து தேவையானவற்றை ஆர்டர் செய்து பெற்றுக்கொள்ளலாம். பரிந்துரைக்கப்பட்ட உணவகங்கள் டயட்டிற்குத் தேவையான உணவுகளை வழங்குவதாக மொபைல் செயலி நிறுவனம் தெரிவித்துள்ளது.
மேலும், 'ஹெல்திஃபைமி' மொபைல் செயலி மூலமாக ஸ்விக்கியில் இரண்டு ஆர்டர்கள் செய்யும்பட்சத்தில் அவர்களுக்கு நிறுவனம் பல்வேறு சிறப்பு சலுகைகளை வழங்குகிறது. உடற்பயிற்சி தொடர்பான மொபைல் செயலியில் இரண்டு முறை ஸ்விக்கியில் பரிந்துரைக்கப்பட்ட டயட் உணவுகளை ஆர்டர் செய்தால், அவர்களுக்கு நிறுவனம் இலவச டயட் திட்ட பட்டியலை (Diet Plan Schedule) வழங்குகிறது.
தற்போது ஹெல்திஃபைமி செயலியை 1.2 கோடி பயனர்கள் உபயோகிக்கின்றனர் எனவும் இவர்களில் பெரும்பாலானவர்கள் ஸ்விக்கியில் டயட் உணவுகளை ஆர்டர் செய்யும்போது ஸ்விக்கி நிறுவனத்தின் வருவாய் பன்மடங்கு உயரும் என எதிர்பார்க்கப்படுவதாகவும் நிறுவன அறிக்கையில் தெரிவிக்கப்பட்டுள்ளது.
ஹெல்திஃபைமி நிறுவன துணைத் தலைவர் அஞ்சன் இதுகுறித்து கூறும்போது, 'ஸ்விக்கியில் ஆரோக்கியமான உணவுகளை வழங்கும் உணவகங்களின் பட்டியலை உடற்பயிற்சி நிபுணர்களை வைத்து உருவாக்கியுள்ளோம். 'ஃபிட்பிக்ஸ் காலெக்ஷன்' என்ற பட்டியலில் உள்ள உணவுகளை ஜனவரி 31ம் தேதிக்கு முன்னதாக இரண்டு முறை ஆர்டர் செய்பவர்களுக்கு ஒரு மாதத்திற்கு எங்களது முதன்மை ஸ்மார்ட் திட்டங்களை இலவசமாக வழங்குகிறோம்' என்றார்.