குழந்தைகள் ஆரோக்கியமான உணவுகளை எடுத்துக்கொள்ள வேண்டுமா?

சமையல் நிகழ்ச்சிகளைப் பார்ப்பது குழந்தைகளிடையே ஆரோக்கியமான உணவை எடுத்துக்கொள்ள ஊக்குவிக்கும் என்று ஆய்வில் தெரிய வந்துள்ளது.

குழந்தைகளுக்கு ஆரோக்கியமான உணவை அளிக்க வேண்டும் என்பது பெற்றோர்களுக்கு மிகப்பெரிய வேலையாக இருக்கிறது. துரித உணவுகளையே விரும்பி சாப்பிடும் குழந்தைகள் ஆரோக்கியமான உணவுகளை எடுத்துக்கொள்ள மறுக்கின்றனர். இதனை எளிதாக்கவே, ஒரு சிறந்த வழியை ஆய்வாளர்கள் கண்டறிந்துள்ளனர். அதன்படி, குழந்தைகளை ஆரோக்கியமான சமையல் நிகழ்ச்சிகளைப் பார்க்க வைக்க ஆய்வாளர்கள் அறிவுறுத்தியுள்ளனர்.

ஜர்னல் ஆஃப் நியூட்ரிஷன் எஜுகேஷன் அண்ட் பிஹேவியர் இதழில் வெளியிடப்பட்ட ஆய்வில், டிவியில் சமையல் நிகழ்ச்சிகளை அதிகம் பார்க்கும் குழந்தைகள் ஆரோக்கியமான உணவுகளை தானாக எடுத்துக்கொள்வதாக தெரிவிக்கப்பட்டுள்ளது. 

10 முதல் 12 வயதுடைய 125 குழந்தைகள் இந்த ஆய்வில் பங்கேற்றனர். குழந்தைகளுக்காக வடிவமைக்கப்பட்ட தொலைக்காட்சியில் ஒரு நிகழ்ச்சியை பார்க்கச் செய்தனர்.தொடர்ந்து அதுபோன்ற பல்வேறு உணவு/ சமையல் சம்மந்தப்பட்ட  நிகழ்ச்சிகளை காணச் செய்தனர். இந்த நிகழ்ச்சியில், ஆரோக்கியமான உணவுகள் தக்காளி, வெங்காயம், பழங்கள் மற்றும் காய்கறிகள் இடம்பெற்றிருந்தன. ஆரோக்கியமற்ற உணவுகளை மையமாகக் கொண்ட சில காட்சிகளும் காண்பிக்கப்பட்டது.

தொடர்ந்து, ஆய்வில் பங்கேற்ற குழந்தைகளுக்கு அங்கு காண்பித்த உணவுகளில் சில சிற்றுண்டியாக வழங்கப்பட்டது. அதனை அவர்கள் விருப்பமாகவே தேர்வு செய்யலாம். அவ்வாறு தேர்வு செய்த குழந்தைகள் பல ஆரோக்கியமான உணவுகளையே தேர்ந்தெடுத்தனர். 41 சதவிகிதத்திற்கும் அதிகமான குழந்தைகள் ஆப்பிள் அல்லது வெள்ளரி போன்ற ஆரோக்கியமான சிற்றுண்டியைத் தேர்ந்தெடுத்தனர். 20 சதவிகித குழந்தைகளே மிகவும் ஆரோக்கியமற்ற சிற்றுண்டியைத் தேர்ந்தெடுத்தனர். 

பெற்றோர்களைப் பொறுத்தவரை குழந்தைகள் ஆரோக்கியமான உணவுகளை எடுத்துக்கொள்ள தொடர்ந்து இதுபோன்ற பல்வேறு முறைகளில் ஊக்குவிக்க வேண்டும் என்றும் ஆராய்ச்சியாளர்கள் வலியுறுத்துகின்றனர்.