புதுக்கோட்டை: ஊரக உள்ளாட்சித் தேர்தலில் முதல் கட்டமாக வெள்ளிக்கிழமை நடைபெறவுள்ள முதல் கட்ட வாக்குப்பதிவில் மொத்தம் 4,79,791 வாக்காளர்கள் வாக்களிக்கவுள்ளனர். இவர்களில் 2,40,795 பேர் ஆண்கள், 2,38,977 பேர் பெண்கள், 19 பேர் திருநங்கைகள்.
முதல் கட்டத் தேர்தலில் மாவட்டத்திலுள்ள 13 ஒன்றியங்களில் அன்னவாசல், விராலிமலை, குன்றாண்டார்கோயில், கந்தர்வகோட்டை, கறம்பக்குடி, புதுக்கோட்டை ஆகிய 6 ஒன்றியங்களுக்குத் தேர்தல் நடைபெறவுள்ளது.
இவற்றில் மொத்தமுள்ள மாவட்ட ஊராட்சிக் குழு உறுப்பினர் பதவியிடங்களான 22இல், 10 வார்டு உறுப்பினர் பதவியிடங்களுக்கான வாக்குப்பதிவு முதல் கட்டமாக நடைபெறவுள்ளது. இந்தப் பத்து இடங்களுக்கு 54 பேர் போட்டியிடுகின்றனர்.
அன்னவாசல் ஊராட்சி ஒன்றியக் குழு உறுப்பினர் பதவியிடங்கள்- 20, விராலிமலை ஊராட்சி ஒன்றியக் குழு உறுப்பினர் பதவியிடங்கள்- 21, குன்றாண்டார்கோயில் ஊராட்சி ஒன்றியக் குழு உறுப்பினர் பதவியிடங்கள்- 14, கந்தர்வகோட்டை ஊராட்சி ஒன்றியக் குழு உறுப்பினர் பதவியிடங்கள்- 14, கறம்பக்குடி ஊராட்சி ஒன்றியக் குழு உறுப்பினர் பதவியிடங்கள்- 16, புதுக்கோட்டை ஊராட்சி ஒன்றியக் குழு உறுப்பினர் பதவியிடங்கள்- 15 என மொத்தம் 100 ஊராட்சி ஒன்றியக் குழு உறுப்பினர் பதவியிடங்களுக்கு முதல் கட்டமாக வாக்குப்பதிவு நடைபெறவுள்ளது.
இவை தவிர, ஏறத்தாழ 1,700 கிராம ஊராட்சி வார்டு உறுப்பினர் பதவியிடங்களுக்கும், 219 கிராம ஊராட்சித் தலைவர் பதவியிடங்களுக்கும் வாக்குப்பதிவு நடைபெறவுள்ளது.
முதல் கட்ட வாக்குப்பதிவுக்காக 1,056 வாக்குச்சாவடிகள் அமைக்கப்பட்டுள்ளன. சுமார் 9 ஆயிரம் வாக்குச்சாவடிப் பணியாளர்கள் பணியில் அமர்த்தப்பட்டுள்ளனர்.
டிசம்பர் 27ம் தேதி வெள்ளிக்கிழமை காலை 7 மணிக்கு வாக்குப்பதிவு தொடங்கி, மாலை 5 மணி வரை நடைபெறுகிறது.