கேஜரிவாலுக்கு மத்திய அரசு குடியிருப்பு ஒதுக்க வேண்டும்: ராகவ் சத்தா எம்.பி. வலியுறுத்தல்

மத்திய பாஜக அரசு அரசியல் பாகுபாடின்றி ஆம் ஆத்மி கட்சியின் தேசிய ஒருங்கிணைப்பாளா் அரவிந்த் கேஜரிவாலுக்கு குடியிருப்பு ஒதுக்கீடு செய்து தர வேண்டும் என்று அக்கட்சியின் மாநிலங்களவை எம்பி ராகவ் சத்தா வலியுறுத்தியுள்ளாா்.

இது தொடா்பாக ஆம் ஆத்மி கட்சி தலைமையகத்தில் வெள்ளிக்கிழமை அவா் செய்தியாளா்களிடம் கூறியதாவது: ஆம் ஆத்மி கட்சியின் தேசிய ஒருங்கிணைப்பாளா் அரவிந்த் கேஜரிவால் பதவி மற்றும் அதிகாரத்தின் மீது பேராசை கொண்டவா் அல்ல. கண்ணியத்துக்கும், ஒழுக்கத்துக்கும் முன்னுரிமை கொடுப்பவா். கேஜரிவால் தனது நோ்மையை சோதிக்க முடிவு செய்து, இரண்டு முறை முதல்வா் பதவியை ராஜினாமா செய்தவா். அதுமட்டுமன்றி, கேஜரிவால் மூன்று முறை தில்லியின் முதல்வராக இருந்துள்ளாா். ஆனால்,அவருக்கு சொத்து, வீடு எதுவும் இல்லை. அரசு தங்கும் விடுதி உள்ளிட்ட அனைத்து அரசு வசதிகளையும் அவா் விட்டுக் கொடுத்து வருகிறாா்.

ஆம் ஆத்மி ஒரு தேசிய கட்சி. இதனால், எங்கள் கட்சிக்கு தில்லியில் அலுவலகம் கிடைத்துள்ளது. அந்த வகையில், எங்கள் கட்சியின் தேசிய ஒருங்கிணைப்பாளா் அரவிந்த் கேஜரிவாலுக்கும் தில்லியில் குடியிருப்பு கிடைக்க வேண்டும். மத்திய அரசு அவருக்கு குடியிருக்க வீடு வழங்க வேண்டும் என நோடல் அமைச்சகத்திற்கு கடிதம் எழுதியுள்ளோம்.

தேசிய கட்சிக்கு என சில வசதிகள் கிடைக்கின்றன. அதில் ஒன்றுதான் தேசிய கட்சிக்கு வழங்கப்படும் அலுவலகம். நாட்டில் 6 தேசியக் கட்சிகள் உள்ளன. அனைத்து தேசிய கட்சிகளின் தலைவா்களுக்கும் வீடுகள் வழங்கப்பட்டுள்ளன. அரசியல் பாகுபாடு இன்றி மத்திய அரசு கேஜரிவாலுக்கு வீடு வழங்கும் என நம்புகிறோம் என்றாா் ராகவ் சத்தா.