காஞ்சிபுரத்தை அடுத்த ஏரிவாக்கம் கிராமத்தில் புதிதாக அமைக்கப்பட்ட சாய்பாபா தியான நிலையத்தின் கும்பாபிஷேக விழா வியாழக்கிழமை விமரிசையாக நடைபெற்றது.
இப்பகுதியில் அற்புத சாய்பாபா, கல்வி கணபதி, வீர ஆஞ்சநேயர் சுவாமிகளுக்கு தியான நிலையம் அண்மையில் அமைக்கப்பட்டது. அந்த தியான நிலையத்தின் அஷ்ட பந்தன கும்பாபிஷேகம் வியாழக்கிழமை நடைபெற்றது. இதையொட்டி, கடந்த 14-ஆம் தேதி அனுக்ஞை உள்ளிட்ட பூஜைகள் நடந்தன.
இதைத்தொடர்ந்து, 15-ஆம் தேதி சப்த நதி தீர்த்தம் வீதி வலம் வருதல், ரக்க்ஷôபந்தனம், சக்தியாகர்ஷணம், கும்பங்கள் யாக சாலை பிரவேசம், அக்னி பிரதிஷ்டை, பிரதான ஹோமங்கள், வேத திவ்ய பிரபந்த சாற்றுமுறை, கர்மாங்க ஸ்நபன திருமஞ்சனம், கும்பம், மண்டல, பிம்ப, துவார, அக்னி சதுஸ்தான ஆராதனம் உள்ளிட்ட நிகழ்ச்சிகள் நடத்தப்பட்டன.
இதையடுத்து, வியாழக்கிழமை காலை 6.30 மணியளவில் கோ பூஜையுடன் தொடங்கி விஸ்வரூபம், கும்ப மண்டல பிம்ப, துவார, அக்னி சதுஸ்தான ஆராதனம், பிராண பிரதிஷ்டா ஹோமம் உள்ளிட்ட சடங்குகள் நடத்தப்பட்டன. பின்னர், காலை 9 மணியளவில் மகா கும்பாபிஷேகம் நடைபெற்றது.
இதில், கலந்துகொண்ட அனைவருக்கும் புனித நீர் தெளிக்கப்பட்டது. அதைத் தொடர்ந்து பக்தர்கள் சுவாமி தரிசனம் செய்தனர். தொடர்ந்து, அன்னதானம் செய்யப்பட்டது. விழா ஏற்பாடுகளை கோயில் நிர்வாகத்தினரும், விழாக் குழுவினரும் செய்திருந்தனர்.