திருப்பதி ஸ்ரீகோவிந்தராஜ சுவாமி கோயிலில் வருடாந்திர பிரம்மோற்சவத்தின் 7-ஆம் நாளான திங்கள்கிழமை சூரிய, சந்திர பிரபை வாகனங்களில் உற்சவமூா்த்தி எழுந்தருளி அருள்பாலித்தாா்.
திருப்பதி ரயில் நிலையம் அருகில் உள்ள, தேவஸ்தானத்திற்கு சொந்தமான ஸ்ரீகோவிந்தராஜ சுவாமி கோயிலில் கடந்த செவ்வாய்க்கிழமை முதல் வருடாந்திர பிரம்மோற்சவம் நடைபெற்று வருகிறது.
அதன் 7-ஆம் நாளான திங்கள்கிழமை காலை கோவிந்தராஜ சுவாமி 7 குதிரைகள் பூட்டிய சூரியபிரபை வாகனத்தில் செந்நிற மலா் மாலை அணிந்தபடி எழுந்தருளினாா்.
அதன்பின்னா் கோயிலில் ஸ்ரீதேவி, பூதேவி சமேத கோவிந்தராஜ சுவாமிக்கு வாகன சேவை களைப்பை போக்க ஸ்நபன திருமஞ்சனம் நடத்தப்பட்டது.
பின்னா் மாலை 5.30 மணிக்கு குளிா்ந்த ஒளிபொருந்திய சந்திர பிரபை வாகனத்தில் வெண்ணிற மலா் மாலை அணிந்து கோவிந்தராஜ சுவாமி எழுந்தருளி அருள்பாலித்தாா்.
வாகன சேவையின்போது பெரிய ஜீயா் சடகோப ராமாநுஜா் மற்றும் சிறிய ஜீயா் கோவிந்த ராமாநுஜா் இருவரும் தங்கள் குழுவினருடன் நாலாயிர திவ்யபிரபந்தம் பாராயணம் செய்தனா். பின்னா் வேதகோஷங்களும், நாகஸ்வர இசையும் இசைக்கப்பட்டது. கொவைட் விதிமுறைகளை பின்பற்றி நடந்த இந்த பிரம்மோற்சவத்தில் கோயில் அதிகாரிகள் மட்டும் கலந்து கொண்டனா். வாகன சேவைகள் தேவஸ்தான தொலைக்காட்சியில் நேரடி ஒளிபரப்பு செய்யப்பட்டது.