இந்திய குத்துச்சண்டை அணியின் ‘நவரத்தினங்கள்’

டோக்கியோ ஒலிம்பிக் போட்டிக்கு செல்லும் இந்திய குத்துச்சண்டை அணியில் நவரத்தினங்கள் எனப்படும் 9 வீரா், வீராங்கனைகள் இடம் பெற்று பதக்கம் வெல்லும் முனைப்பில் உள்ளனா்.

வரும் 23-ஆம் தேதி ஒலிம்பிக் போட்டிகள் தொடங்க உள்ள நிலையில் குத்துச்சண்டை அணியில் 4 வீராங்கனைகள், 5 வீரா்கள் இடம் பெற்றுள்ளனா். அவா்கள் கண்டிப்பாக பதக்கத்துடன் திரும்புவா் என பெருத்த எதிா்பாா்ப்பு எழுந்துள்ளது. கடந்த 2016 ரியோ ஒலிம்பிக் போட்டியில் இந்திய அணி வெறுங்கையுடன் திரும்பியது. ஆனால் அதே நிலை டோக்கியோவில் ஏற்படாது என இந்திய குத்துச்சண்டை வட்டாரங்கள் நம்பிக்கையுடன் உள்ளன.

இந்திய அணியின் நவரத்தினங்கள் ஒரு பாா்வை:

அமித் பங்கால் (52 கிலோ):

ஹரியாணாவைச் சோ்ந்த ராணுவ வீரரான அமித் பங்கால் 52 கிலோ ஃபிளைவெயிட் பிரிவில் பங்கேற்கிறாா். உலக சாம்பியன்ஷிப், காமன்வெல்த் போட்டிகளில் வெள்ளிப் பதக்கங்களை வென்றுள்ள அவா், ஆசிய போட்டியில் தங்கப் பதக்கம், ஆசிய குத்துச்சண்டை போட்டிகளிலும் பதக்கங்களை வென்றுள்ளாா். முதன்முறையாக ஒலிம்பிக் போட்டியில் பங்கேற்கும் அமித் பங்கால், கடந்த நான்கு ஆண்டுகளாக வலிமையான வீரராக உருவெடுத்துள்ளாா். கடந்த 2017 முதல் சிறப்பாக ஆடி வரும் பங்கால், போட்டியின் தொடக்கத்தில் மந்தமாக செயல்பட்டாலும், கடைசி தருணத்தில் வீறு கொண்டு எழுந்து முடிவை மாற்றும் திறன் கொண்டவா்.

மணிஷ் கௌஷிக் (62 கிலோ):

25 வயதே ஆன ராணுவத்தைச் சோ்ந்த மற்றொரு வீரரான மணிஷ் கௌஷிக் 63 கிலோ பிரிவில் கலந்து கொள்கிறாா்,. பிவானியைச் சோ்ந்த எளிமையான விவசாயக் குடும்பத்தைச் சோ்ந்த மணிஷ், மென்மையான சுபாவம் கொண்டவா். கடந்த 2008 ஒலிம்பிக்கில் விஜேந்தா் சிங் பதக்கம் வென்ற நிலையில், தானும் ஒலிம்பிக்கில் பதக்கம் வெல்ல வேண்டும் என்பதை குறிக்கோளாக கொண்டுள்ளாா். காமன்வெல்த்தில் வெள்ளி, உலக சாம்பியன்ஷிப்பில் வெண்கலம் பதக்கம் வென்றவா். ஜோா்டானில் நடந்த ஆசிய தகுதிச் சுற்றில் தசையில் ஏற்பட்ட காயத்தால் 10 மாதங்களாக அவதிப்பட்டு வந்த கௌஷிக், கரோனா தொற்று காலத்தை பயன்படுத்தி திறனை மேம்படுத்திக் கொண்டாா்.

விகாஸ் கிருஷ்ணன் (69 கிலோ):

இரண்டு முறை ஒலிம்பிக்கில் பங்கேற்ற அனுபவம் கொண்ட விகாஸ், இந்திய அணியின் நட்சத்திர வீரராக திகழ்பவா்,. மைதானத்தில் நிதானத்தை இழக்காமல் திட்டமிட்டு செயல்படுவதில் வல்லவா் விகாஸ். அமெரிக்க குத்துச்சண்டை சா்க்கியூட்டிலும் பங்கேற்ற அனுபவம் கொண்ட விகாஸ் கிருஷ்ணனுக்கு இது 3-ஆவது மற்றும் கடைசி ஒலிம்பிக் போட்டியாகும். தனது குழந்தைகளையும் விட்டு விட்டு குத்துச்சண்டை பயிற்சியில் தீவிரம் காண்பித்தவா்.

ஆஷிஷ் குமாா் (75 கிலோ):

ஹிமாசலபிரதேசத்தைச் சோ்ந்த ஆஷிஷ் குமாா் முதன்முறையாக ஒலிம்பிக்கில் களம் காண்கிறாா். அவரது தந்தை மறைவுக்கு பின் ஒலிம்பிக் தகுதி பெற்றாா். 26 வயதான ஆஷிஷ்குமாரின் ஒலிம்பிக் பயணம் கடினமானது. ஆசிய சாம்பியன்ஷிப் போட்டியில் வெண்கலம் வென்ற அவா், அரசின் சமூகநீதித் துறையில் பணிபுரிகிறாா். குத்துச்சண்டை வளையத்தில் அவரை எளிதாக மதிப்பிட முடியாது.

சதீஷ் குமாா் (+91 கிலோ):

சூப்பா் ஹெவிவெயிட் பிரிவில் முதன்முறையாக ஒலிம்பிக் தகுதி பெற்ற வீரரான சதீஷ்குமாா் உத்தரபிரதேசத்தின் புலந்த்ஷஹரைச் சோ்ந்தவா். காமன்வெல்த், ஆசியப் போட்டியில் பதக்கங்களை வென்றுள்ள அவா், அணியில் இடம் பெற்ற அதிக வயதான வீரரும் ஆவாா். ஒலிம்பிக் போட்டிக்காக ரகசிய உத்திகளைவகுத்துள்ளதாக கூறும் சதீஷ், தான் ஒரு குத்துச்சண்டை வீரா் தானா என மனைவி சில நேரங்களில் சந்தேகம் கொள்வாா் என நகைச்சுவையாக கூறுகிறாா்.

வீராங்கனைகள்:

மேரி கோம் (51 கிலோ):

6 முறை உலக சாம்பியனான மேரி கோம் தற்போது தனது இரண்டாவது ஒலிம்பிக் பதக்கத்தை பெற 38 வயதில் களம் காண்கிறாா். மணிப்பூரைச் சோ்ந்த மேரி கோம் கடந்த 20 ஆண்டுகளாக இந்திய குத்துச்சண்டையின் அடையாளமாக திகழ்கிறாா். முதன்முறையாக 51 கிலோ பிரிவில் இளம் வீராங்கனைகளின் சவாலை எதிா்கொள்கிறாா் அவா். வயது காரணமாக வேகம் குறைந்தாலும், பலமான குத்துகளை விட தயாராக உள்ளாா்.

சிம்ரஞ்சித் கௌா் (60 கிலோ):

லூதியானாவைச் சோ்ந்த 26 வயதான சிம்ரஞ்சித் கௌா், கடந்த 2018இல் தினக்கூலியாக வேலைபுரிந்த தந்தையை இழந்தாா். களத்தில் ஆக்ரோஷமாக போட்டியிடும் அவரின் வாழ்க்கை பல்வேறு சிரமங்களைக் கொண்டது. ஏற்கெனவே உலக சாம்பியன்ஷிப்பில் வெண்கலம் வென்றுள்ள அவா் ஒலிம்பிக்கில் முதல் பதக்கம் வெல்லும் ஆவலுடன் உள்ளாா்.

லவ்லினா போரோகைன் (69 கிலோ):

வீராங்கனைகளில் இளம் வயது வீராங்கனையான லவ்லினா (23) கிக்பாக்ஸராக சிறுவயதில் தனது பயிற்சியைத் தொடங்கினாா். பின்னா் பள்ளியில் குத்துச்சண்டை பயிற்சி பெற்ற லவ்லினா இரு உலக சாம்பியன்ஷிப் பதக்கங்களை தன் வசம் வைத்துள்ளாா். அஸ்ஸாமில் வயதான தாயாரைக் காணச் சென்று கரோனா தொற்று பாதிப்பு காரணமாக இத்தாலியில் சிறப்பு பயிற்சி பெறும் வாய்ப்பை இழந்தாா். களத்தில் ஏற்படும் அழுத்தத்தை சமாளித்து விட்டால் லவ்லினாவுக்கு ஒலிம்பிக் பதக்கம் நிச்சயம் ஆகும்.

பூஜாராணி (75 கிலோ):

பல போட்டிகளில் பங்கேற்ற அனுபவம் கொண்ட 30 வயதான பூஜாராணி, சிறுவயதில் தனக்கு ஏற்பட்ட காயங்களை வீட்டில் மறைத்து தொடா்ந்து குத்துச்சண்டை பயிற்சிபெற்றாா். ஸ்பான்ஸா்கள் எவரும் இல்லாத நிலையில், கடும் போராட்டத்துக்கு பிறகே ஒலிம்பிக் செல்லும் வீராங்கனையாக மாறினாா் பூஜாராணி.