பேர்ஸ்டோவ், மணீஷ் அரைசதம் வீண்: கொல்கத்தா 10 ரன்களில் வெற்றி

சன்ரைசர்ஸ் ஹைதராபாத்துக்கு எதிரான ஆட்டத்தில் கொல்கத்தா நைட் ரைடர்ஸ் அணி 10 ரன்கள் வித்தியாசத்தில் வெற்றி பெற்றது.

14-வது ஐபிஎல் சீசனின் 3-வது லீக் ஆட்டத்தில் சன்ரைசர்ஸ் ஹைதராபாத், கொல்கத்தா நைட் ரைடர்ஸ் அணிகள் மோதின. டாஸ் வென்ற ஹைதராபாத் கேப்டன் டேவிட் வார்னர் முதலில் பந்துவீச்சைத் தேர்வு செய்தார்.

இதன்படி முதலில் பேட் செய்த கொல்கத்தா நைட் ரைடர்ஸ் நிர்ணயிக்கப்பட்ட 20 ஓவர்களில் 6 விக்கெட்டுகள் இழப்புக்கு 187 ரன்கள் குவித்தது.

188 ரன்கள் என்ற வெற்றி இலக்குடன் ஹைதராபாத் தொடக்க ஆட்டக்காரர்களாக ரித்திமான் சாஹா, கேப்டன் வார்னர் களமிறங்கினர். 

கொல்கத்தா சிறப்பான தொடக்கம்:

ஹர்பஜன் சிங் வீசிய முதல் ஓவரில் சாஹா 1 சிக்ஸர் அடித்தார். ஆனால், அடுத்த ஓவரில் பிரசித் கிருஷ்ணா பந்தில் கேப்டன் வார்னர் 3 ரன்களுக்கு ஆட்டமிழந்தார். அவரைத் தொடர்ந்து ஷகிப் அல் ஹசன் வீசிய 3-வது ஓவரில் சாஹா 7 ரன்களுக்கு ஆட்டமிழந்தார்.

மணீஷ் பாண்டே - ஜானி பேர்ஸ்டோவ்:

அடுத்தடுத்து 2 விக்கெட்டுகள் விழுந்ததால் இந்த இணை நிதானமாக தொடங்கி பாட்னர்ஷிப் அமைத்தது. பவர் பிளே முடிவில் ஹைதராபாத் அணி 2 விக்கெட்டுகள் இழப்புக்கு 35 ரன்கள் மட்டுமே எடுத்தது. 

பவர் பிளே முடிந்தவுடன் படிப்படியாக அதிரடிக்கு மாறி ஸ்கோரை உயர்த்தினர். இதனால் அணியின் ரன் ரேட் ஓவருக்கு 8-ஐத் தாண்டத் தொடங்கியது. வருண் சக்ரவர்த்தி பந்தில் சிக்ஸர் அடித்த பேர்ஸ்டோவ் 32-வது பந்தில் அரைசதத்தை எட்டினார். ஆனால், அரைசதம் அடித்த கையோடு 55 ரன்களுக்கு ஆட்டமிழந்தார்.

இதையடுத்து, பெரிதளவில் பவுண்டரிகள் போகாததால் வெற்றிக்குத் தேவையான ரன் ரேட் 13-ஐத் தாண்டியது. கடைசி 5 ஓவர்களில் ஹைதராபாத் வெற்றிக்கு 69 ரன்கள் தேவைப்பட்டன.

பிரசித் கிருஷ்ணா வீசிய 16-வது ஓவரில் முகமது நபி 2 பவுண்டரிகள் அடித்தாலும் அதே ஓவரில் 14 ரன்களுக்கு ஆட்டமிழந்தார். அடுத்து களமிறங்கிய விஜய் சங்கர் ஒரு சிக்ஸர் அடித்தார். ஆனால், ரஸல் வீசிய 18-வது ஓவரில் 11 ரன்களுக்கு ஆட்டமிழந்தார். அரைசதம் அடித்து விளையாடி வந்த மணீஷ் பாண்டேவும் பவுண்டரிகள் அடிக்காமல் திணறியதால் கடைசி 2 ஓவர்களில் ஹைதராபாத் வெற்றிக்கு 38 ரன்கள் தேவைப்பட்டன.

கம்மின்ஸ் வீசிய 19-வது ஓவரில் அப்துல் சமத் 2 சிக்ஸர்களைப் பறக்கவிட்டு நம்பிக்கையளித்தார். இதனால், கடைசி ஓவரில் ஹைதராபாத் வெற்றிக்கு 22 ரன்கள் தேவைப்பட்டன.

ஆனால், கடைசி ஓவரை ரஸல் சிறப்பாக வீசியதால் முதல் 5 பந்துகளில் 5 ரன்கள் மட்டுமே ஹைதராபாத்தால் எடுக்க முடிந்தது. கடைசி பந்தில் மட்டும் மணீஷ் பாண்டே சிக்ஸர் அடித்தார்.

நிர்ணயிக்கப்பட்ட 20 ஓவர்களில் சன்ரைசர்ஸ் ஹைதராபாத் 5 விக்கெட்டுகள் இழப்புக்கு 177 ரன்கள் மட்டுமே எடுத்தது. இதன்மூலம், கொல்கத்தா நைட் ரைடர்ஸ் அணி 10 ரன்கள் வித்தியாசத்தில் வெற்றி பெற்றது.

இறுதிவரை ஆட்டமிழக்காமல் இருந்த மணீஷ் 44 பந்துகளில் 61 ரன்களும், அப்துல் சமத் 8 பந்துகளில் 19 ரன்களும் எடுத்தனர்.

கொல்கத்தா தரப்பில் பிரசித் கிருஷ்ணா 2 விக்கெட்டுகளையும், ரஸல், ஷகிப், கம்மின்ஸ் தலா 1 விக்கெட்டையும் வீழ்த்தினர்.