டி20, ஒருநாள், டெஸ்ட் தொடர்களில் விளையாட ஆஸ்திரேலிய சுற்றுப்பயணம் மேற்கொள்ளும் இந்திய அணி அறிவிக்கப்பட்டுள்ளது.
இந்திய டெஸ்ட் அணியில் வேகப்பந்து வீச்சாளர் முகமது சிராஜ் இடம்பெற்றுள்ளார்.
கடந்த சில வருடங்களாக இந்திய ஏ அணிக்காக சிறப்பாகப் பந்துவீசி வருகிறார் சிராஜ். கடந்த வருட ரஞ்சி கோப்பையில் 5 ஆட்டங்களில் 19 விக்கெட்டுகளை எடுத்தார். தென் ஆப்பிரிக்கா, மே.இ. தீவுகள் ஏ அணிகளுக்கு எதிரான இந்திய ஏ அணியில் இடம்பெற்று விளையாடினார்.
2018 இறுதியில் பல டெஸ்ட் பேட்ஸ்மேன்கள் கொண்ட ஆஸ்திரேலிய ஏ அணிக்கு எதிராக 8 விக்கெட்டுகளை எடுத்து அசத்தினார். மே.இ. தீவுகள், இங்கிலாந்து, தென் ஆப்பிரிக்கா, ஆஸ்திரேலியா ஏ அணிகளுக்கு எதிரான 5 முதல்தர ஆட்டங்களில் 40 விக்கெட்டுகளை எடுத்தார். இதனால் தான் அவருக்குரிய மதிப்பைத் தேர்வுக்குழு வழங்கியுள்ளது.
26 வயது சிராஜ், ஒரு ஒருநாள் மற்றும் 3 டி20 ஆட்டங்களில் இந்திய அணிக்காக விளையாடியுள்ளார்.
கடந்த வாரம், ராயல் சேலஞ்சர்ஸ் பெங்களூர் 8 விக்கெட்டுகள் வித்தியாசத்தில் கொல்கத்தா நைட் ரைடர்ஸை வீழ்த்தியது. 3 விக்கெட்டுகள் எடுத்த ஆர்சிபியின் சிராஜ், 2 மெயிடன் ஓவர்கள் வீசி சாதனை படைத்தார். ஐபிஎல் போட்டியில் அதற்கு முன்பு எந்தவொரு பந்துவீச்சாளரும் ஒரே ஆட்டத்தில் 2 மெயிடன் ஓவர்களை வீசியதில்லை.
இதுபோல கிடைத்த வாய்ப்புகளில் திறமையைப் பயன்படுத்தியதால் இந்திய டெஸ்ட் அணியில் முகமது சிராஜுக்கு வாய்ப்பு கிடைத்துள்ளது.