Enable Javscript for better performance
History made in Melbourne under Rahane- Dinamani

சுடச்சுட

    

    36 ஆல் அவுட் - மெல்போர்னில் 8 விக்கெட் வெற்றி: 10 நாள்களுக்குள் விஸ்வரூபம் கொண்ட இந்திய அணி!

    By DIN  |   Published on : 29th December 2020 02:58 PM  |   அ+அ அ-   |    |  

    ashwin_ani_20201228036Lxx

    அஸ்வின்

     


    டிசம்பர் 19 அன்று 36 ரன்களுக்கு ஆட்டமிழந்து, அடிலெய்ட் டெஸ்டில் வரலாற்றுத் தோல்வி கண்டது இந்திய அணி.

    டிசம்பர் 29 அன்று மெல்போர்ன் டெஸ்டில் 8 விக்கெட் வித்தியாசத்தில் வெற்றியடைந்து இன்னொரு புதிய வரலாறைப் படைத்துள்ளது.

    இந்த விஸ்வரூபத்தை யாராவது எதிர்பார்த்திருக்க முடியுமா?

    ஆஸ்திரேலியாவுக்கு எதிரான 2-வது டெஸ்டின் 4-ம் நாளான இன்று இந்திய அணி சிறப்பாகப் பந்துவீசி ஆஸ்திரேலிய அணியை 2-வது இன்னிங்ஸில் 200 ரன்களுக்குள் சுருட்டியது. இதனால் 70 ரன்கள் இலக்கை எளிதாகக் கடந்து 8 விக்கெட் வித்தியாசத்தில் வெற்றி பெற்றது. வெளிநாடுகளில் இந்திய அணி பெற்ற மகத்தான வெற்றியாக இது மதிப்பிடப்படுகிறது.

    எதனால் இந்த வெற்றி பெரிய அளவில் பாராட்டப்படுகிறது? வரலாற்றில் இடம் பிடித்துள்ளது?

    10 நாள்களுக்கு முன்பு தான் தனது குறைந்தபட்ச டெஸ்ட் ஸ்கோரை எடுத்து அவமானப்பட்டது இந்திய அணி. அதுவும் முதல் இன்னிங்ஸில் முன்னிலை பெற்ற பிறகு மோசமான பேட்டிங்கால் வெற்றி வாய்ப்பை இழந்தது. இனி மீண்டெழ முடியாது என நம்பிக்கை இழந்தார்கள் இந்திய ரசிகர்கள்.

    முதல் குழந்தை பிறக்கும்போது மனைவி அனுஷ்கா சர்மாவுக்குத் துணையாக இருக்க வேண்டும் என்பதற்காக முதல் டெஸ்டை முடித்துவிட்டு இந்தியாவுக்குத் திரும்பிவிட்டார் விராட் கோலி. இதனால் டெஸ்ட் தொடரின் மீதமுள்ள மூன்று டெஸ்டுகளுக்கும் ரஹானே கேப்டனாகச் செயல்பட வேண்டிய நிலைமை. கோலி செல்வதால் இரு பின்னடைவுகள். மகத்தான கேப்டனின் துணை இல்லாதது, கோலி போன்ற வலுவான பேட்ஸ்மேன் அணியை விட்டு விலகுவதால் உண்டாகும் இழப்புகள். இக்காரணத்தால் டெஸ்ட் தொடரை 4-0 என ஆஸ்திரேலியா வெல்லும் என்று சொல்லாத முன்னாள் வீரர்களே கிடையாது. 

    சதமடித்த ரஹானே

    கடந்த சில வருடங்களாக வெளிநாடுகளில் இந்திய அணியின் வெற்றிக்கு முக்கியப் பங்களித்தவர்கள் ஷமியும் இஷாந்த் சர்மாவும். ஐபிஎல் போட்டியில் ஏற்பட்ட காயம் காரணமாக டெஸ்ட் தொடரிலிருந்து முழுமையாக விலகினார் இஷாந்த் சர்மா. ஷமிக்கு முதல் டெஸ்டில் காயம் ஏற்பட்டது. அந்தப் பக்கம் ஆஸ்திரேலிய அணி ஸ்டார்க், கம்மின்ஸ், ஹேசில்வுட் என முழு பலத்துடன் இருக்கும்போது இந்தப் பக்கம் இந்திய அணியில் பிரதான இரு வேகப்பந்துவீச்சாளர்கள் இல்லை. இதுபோதாதென்று உமேஷ் யாதவால் 2-வது டெஸ்டின் 2-வது இன்னிங்ஸில் முழுதாகப் பந்துவீச முடியவில்லை. காயத்தால் விலகினார். இதனால் நான்கு பந்துவீச்சாளர்களை வைத்து மட்டும் 2-வது இன்னிங்ஸில் விளையாடியது இந்திய அணி. ஆனாலும் ஆஸ்திரேலிய அணியால் டெஸ்ட் தொடரில் இதுவரை அதிகபட்சமாக 200 ரன்கள் தான் எடுக்க முடிந்துள்ளது. ஆஸ்திரேலிய மண்ணில் இந்திய அணியின் பந்துவீச்சு இந்தளவுக்கு ஆதிக்கம் செலுத்தும் என்று யார் கற்பனை செய்திருக்க முடியும்! 

    முதல் டெஸ்டில் மோசமாகத் தோற்றபோதும் ஷுப்மன் கில், சிராஜ் என இரு புதியவர்களைக் களத்தில் இறக்கியது இந்திய அணி. இருவருமே அற்புதமாக விளையாடி வெற்றிக்கு உதவியுள்ளார்கள்.

    மெல்போர்ன் டெஸ்டில் முதல் நாளன்று டாஸில் தோற்றது. இதனால் கடைசியாக பேட்டிங் செய்ய வேண்டிய நிலைமை. ஆனால் ஓர் அணிக்கு என்னென்ன தடைகள் நேருமோ அத்தனையும் மெல்போர்ன் டெஸ்டில் எதிர்கொண்ட இந்திய அணி, எதையும் பொருட்படுத்தாமல் 8 விக்கெட் வித்தியாசத்தில் வென்றுள்ளது.

    இதைவிட இன்னொரு மகத்தான டெஸ்ட் வெற்றியை இந்திய கிரிக்கெட்டால் சந்திக்க முடியாது என்றுதான் தோன்றுகிறது. ரஹானேவும் இந்திய அணியும் தொடர்ந்து சாதிப்பார்கள். 10 நாள்களுக்குள் இப்படியொரு மாற்றம் ஏற்படும் நாம் நினைக்கவில்லை. ஆனால் இந்திய அணிக்கு இந்த நம்பிக்கையும் லட்சியமும் இருந்திருக்கிறது. 

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    flipboard facebook twitter whatsapp