வங்கதேசம், ஆஸ்திரேலியா இடையிலான முதல் டெஸ்ட் போட்டி டாக்காவில் ஞாயிற்றுக்கிழமை தொடங்கி நடைபெறுகிறது. இதில் டாஸ் வென்ற வங்கதேசம் பேட்டிங்கை தேர்வு செய்தது.
இதையடுத்து களமிறங்கிய அந்த அணி தனது முதல் இன்னிங்ஸில் 78.5 ஓவர்களில் 260 ரன்களுக்கு ஆல்-அவுட்டானது. ஷகிப் அல் ஹசன் 84 ரன்களும், தமிம் இக்பால் 71 ரன்களும் குவித்தனர்.
ஆஸ்திரேலிய தரப்பில் சிறப்பாக பந்துவீசிய பாட் கம்மின்ஸ், நாதன் லயன் மற்றும் ஆஷ்டன் ஆகர் ஆகியோர் தலா 3 விக்கெட்டுகளை வீழ்த்தினர்.
பின்னர் களமிறங்கிய ஆஸ்திரேலிய அணி முதல் இன்னிங்ஸில் 217 ரன்களுக்கு ஆல்-அவுட்டானது. அதிகபட்சமாக மாட் ரென்ஷா 45, ஆஷ்ட்ன் ஆகர் 41 ரன்கள் எடுத்தனர்.
அற்புதமாக பந்துவீசிய வங்கதேச நட்சத்திர ஆல்-ரவுண்டர் ஷகிப் அல் ஹசன் 68 ரன்களை விட்டுக்கொடுத்து 5 விக்கெட்டுகளைக் கைப்பற்றினார். மெஹதி ஹாசன் 3 விக்கெட்டுகள் வீழ்த்தினார்.
இதையடுத்து, 43 ரன்கள் முன்னிலையுடன் 2-ஆவது இன்னிங்ஸை தொடங்கிய வங்கதேச அணி 2-ஆம் நாள் ஆட்டநேர முடிவில் 1 விக்கெட் இழப்புக்கு 45 ரன்கள் எடுத்துள்ளது. துவக்க வீரர் தமிம் இக்பால் 30 ரன்களுடன் களத்தில் உள்ளார்.
இந்நிலையில், ஆஸ்திரேலியாவை விட வங்கதேச அணி 2-ஆம் நாள் ஆட்டநேர முடிவு வரை 88 ரன்கள் முன்னிலைப் பெற்றுள்ளது.