உலகளவில் அதிக வருவாய் ஈட்டும் விளையாட்டு வீராங்கனைகள் தொடர்பாக ஃபோர்ப்ஸ் பத்திரிகை வெளியிட்டுள்ள டாப் 15 பட்டியலில் ஒரே இந்தியராக பாட்மிண்டன் வீராங்கனை பி.வி. சிந்து இடம்பிடித்துள்ளார்.
அவரது ஆண்டு வருவாய் ரூ. 39 கோடியாக மதிப்பிடப்பட்டுள்ளது. விளம்பரங்கள் உள்ளிட்ட வகைகளில் சுமார் ரூ. 35 கோடியும், இந்திய அணியில் ஊதியமாக பெற்றது, போட்டிகளில் வென்றது போன்ற வகையில் ரூ. 4 கோடியும் சிந்து ஈட்டியதாகத் தெரிவிக்கப்பட்டுள்ளது. ஜூன் 1, 2018 முதல் ஜூன் 1, 2019 வரையிலான காலக்கட்டத்தில் வீராங்கனைகள் ஈட்டிய வருவாய், கணக்கில் எடுத்துக்கொள்ளப்பட்டுள்ளது. குறைந்தபட்சம் ரூ. 35 கோடி ($ 5 மில்லியன்) வருவாய் ஈட்டிய வீராங்கனைகள் டாப் 15 பட்டியலில் இடம்பெற்றுள்ளார்கள்.
உலகின் அதிக வருவாய் ஈட்டும் விளையாட்டு வீராங்கனையாக அமெரிக்க டென்னிஸ் வீராங்கனை செரீனா வில்லியம்ஸ் (37) நான்காவது முறையாக முதலிடத்தைப் பிடித்துள்ளார். அவரது ஆண்டு வருவாய் சுமார் ரூ 207 கோடி ($29.2 மில்லியன்) என்று மதிப்பிடப்பட்டுள்ளது. முதல் 15 இடம் பிடித்த வீராங்கனைகளில் 11 பேர் டென்னிஸ் விளையாட்டில் ஈடுபடுபவர்கள்.