கடந்த நவம்பர் மாதம் நடைபெற்ற உலக மகளிர் குத்துச்சண்டை போட்டியில் இந்திய நட்சத்திர வீராங்கனை மேரி கோம் 48 கிலோ எடைப்பிரிவில் 6-ஆவது முறையாக தங்கப் பதக்கம் வென்று சாம்பியன் ஆனார். உலகப் போட்டிகளில் அவர் பெறும் 7-ஆவது பதக்கம் இதுவாகும்.
6 தங்கம் வென்ற முதல் வீராங்கனை என்ற சாதனையையும் படைத்தார் மேரி. அயர்லாந்தின் கேத்தி டெய்லரும் உலகப் போட்டிகளில் 5 தங்கம், ஒரு வெண்கலம் வென்றிருந்தார். மேரியும் 5 தங்கம், 1 வெள்ளிப்பதக்கத்துடன் 6 பதக்கங்கள் சமமாக இருந்த நிலையில் தற்போது 6-ஆவது முறையாக தங்கம் வென்று 7-ஆவது பதக்கத்துடன் அதிக பதக்கங்கள் வென்ற வீராங்கனை என்ற புதிய சாதனையை படைத்தார்.
இந்நிலையில் சமீபத்தில் வெளியிடப்பட்டுள்ள சர்வதேசக் குத்துச் சண்டைத் தரவரிசையில் முதலிடம் பிடித்துள்ளார் மேரி கோம். இதையடுத்து சமூகவலைத்தளங்களில் அவருக்குப் பாராட்டுகள் குவிந்துள்ளன.