சுடச்சுட

    

    40-வது ஒருநாள் சதம் எடுத்த விராட் கோலி: ஆஸி. அணிக்கு 251 ரன்கள் வெற்றி இலக்கு!

    By எழில்  |   Published on : 05th March 2019 04:58 PM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    kohli_40

     

    ஆஸ்திரேலியாவுக்கு எதிரான 2-வது ஒருநாள் ஆட்டத்தில் இந்திய அணி 250 ரன்கள் எடுத்துள்ளது.

    டி20 தொடரை 2-0 எனச் சொந்த மண்ணில் இழந்த நிலையில், ஹைதராபாத்தில் நடைபெற்ற முதல் ஆட்டத்தில் தோனி-ஜாதவ் அதிரடியால் 6 விக்கெட் வித்தியாசத்தில் வெற்றி பெற்றது இந்தியா. இதன் தொடர்ச்சியாக 2-வது ஆட்டம் நாக்பூர் விசிஏ மைதானத்தில் இன்று தொடங்கியுள்ளது. 

    டாஸ் வென்ற ஆஸி. கேப்டன் ஃபிஞ்ச் ஃபீல்டிங்கைத் தேர்வு செய்தார். இந்திய அணியில் மாற்றங்கள் எதுவும் இல்லை. ஆஸி. அணியில் ஷான் மார்ஷ், நாதன் லயன் ஆகியோர் இடம்பிடித்துள்ளார்கள்.

    சமீபகாலமாக இந்திய அணிக்கு நல்ல தொடக்க அமைவதில்லை. ரோஹித் சர்மா, தவன் என இருவரில் யாராவது ஒருவர் சீக்கிரம் ஆட்டமிழந்து விடுகிறார்கள். இன்றைக்கு முதல் ஓவரிலேயே ரன் எதுவும் ஆட்டமிழந்தார் ரோஹித் சர்மா. கடகடவென 4 பவுண்டரிகள்  அடித்த தவன் இந்த வாய்ப்பைப் பயன்படுத்திக்கொள்ளாமல் 21 ரன்களில் மேக்ஸ்வெல் பந்துவீச்சில் ஆட்டமிழந்தார். நிதானமாக விளையாடிய ராயுடு 18 ரன்களில் லயன் பந்துவீச்சில் ஆட்டமிழந்தார். இதையடுத்து தமிழகத்தின் விஜய் சங்கர் களமிறங்கினார்.

    அவரும் விராட் கோலியும் நல்ல கூட்டணி அமைத்தார்கள். பந்துகளை வீணடிக்காமல் ரன்கள் சேர்த்தார்கள். இதனால் 50 பந்துகளில் இருவரும் 50 ரன்கள் கூட்டணியை அமைதார்கள். இருவரும் பந்துகளை வீணடிக்காமல் ரன்கள் எடுத்தார்கள். விராட் கோலி 55 பந்துகளில் 5 பவுண்டரிகளுடன் அரை சதத்தைப் பூர்த்தி செய்தார். இது அவருடைய 50-வது அரை சதம். கடந்த ஏழு ஒருநாள் ஆட்டங்களில் 43 ரன்களுக்குக் குறையாமல் அவர் எடுத்ததில்லை. கடந்த ஏழு இன்னிங்ஸில் ஒரு சதமும் 3 அரை சதங்களும் எடுத்துள்ளார். நான்கு முறை 40களில் ஆட்டமிழந்துள்ளார்.

    விரைவாக ரன்கள் எடுத்து கேப்டன் கோலியையும் இந்திய ரசிகர்களையும் மகிழ்வித்த விஜய் சங்கர் துரதிர்ஷ்டவசமான முறையில் ரன் அவுட் ஆனார். ஸம்பா பந்துவீச்சில் கோலி அடித்த ஸ்டிரெய்ட் டிரைவ் ஸம்பாவின் கைகளில் உரசி ஸ்டம்பில் பட்டது. அப்போது கிரிஸுக்கு வெளியே விஜய் சங்கர் இருந்ததால் 46 ரன்களில் எதிர்பாராதவிதமாக வெளியேற வேண்டியிருந்தது. 41 பந்துகளில் 1 சிக்ஸர், 5 பவுண்டரிகள் அடித்து ரசிகர்களின் பாராட்டுகளைப் பெற்றார் விஜய் சங்கர்.

    இந்திய அணி 30 ஓவர்களில் 4 விக்கெட் இழப்புக்கு 161 ரன்கள் எடுத்துள்ளது. இதனால் கடைசி 20 ஓவர்களில் குறைந்தபட்சம் 120 ரன்கள் எடுக்கும் என எதிர்பார்க்கப்பட்டது. 

    அதன்பிறகு, இந்திய அணிக்கு அதிர்ச்சிகள் காத்திருந்தன. அடுத்தடுத்த பந்துகளில் ஜாதவும் (11 ரன்கள்) தோனியும் (0) வெளியேறினார்கள். இதனால் சில ஓவர்களிலேயே இந்திய அணிக்கு நெருக்கடி ஏற்பட்டது. எனினும் அடுத்து வந்த ஜடேஜா, கேப்டன் விராட் கோலிக்கு நல்ல இணையாக விளங்கினார். பந்துகளை வீணடித்தாலும் மேலும் விக்கெட்டுகள் விழாமல் பார்த்துக்கொண்டார்.  

    107 பந்துகளில் தனது சதத்தைப் பூர்த்தி செய்தார் விராட் கோலி. இது அவருடைய 40-வது ஒருநாள் சதம். சச்சின் டெண்டுல்கருக்கு அடுத்து மகத்தான பேட்ஸ்மேனாக விளங்கும் விராட் கோலி, 216 இன்னிங்ஸில் இந்த எண்ணிக்கையை எட்டியுள்ளார். அதிக ஒருநாள் சதங்கள் அடித்த பட்டியலில் 49 சதங்களுடன் சச்சின் முதலிடத்திலும் கோலி இரண்டாம் இடத்திலும் உள்ளார்கள்.

    ஒருநாள் கிரிக்கெட்டில் 2000 ரன்கள், 150 விக்கெட்டுகள் எடுத்த இந்திய வீரர்களின் பட்டியலில் இணைந்த ரவீந்திர ஜடேஜா, 46-வது ஓவரில் 21 ரன்களில் ஆட்டமிழந்தார். இதனால் கடைசி 4 ஓவர்களில் பின்வரிசை வீரர்களுடன் இணைந்து விளையாடிய நிலைமை கோலிக்கு ஏற்பட்டது. எனினும் சிக்ஸ் அடிக்க முயன்று கம்மின்ஸ் பந்துவீச்சில் ஸ்டாய்னிஸிடம் கேட்ச் கொடுத்து அவர் 116 ரன்களில் ஆட்டமிழந்தார். இதனால் இந்திய ரசிகர்கள் மிகவும் ஏமாற்றம் அடைந்தார்கள்.

    அதே ஓவரில் குல்தீப் யாதவ் 3 ரன்களில் ஆட்டமிழக்க, இந்திய அணியின் இன்னிங்ஸ் முடிவை நெருங்கியது. அடுத்த ஓவரில் பும்ரா ரன் எதுவும் எடுக்காமல் ஆட்டமிழந்தார். இதனால் கடைசி நான்கு ஓவர்களில் ஓரளவு ரன்கள் எடுக்கலாம் என்கிற கோலியின் விருப்பம் நிறைவேறாமல் போனது. 

    இந்திய அணி, 48.2 ஓவர்களில் 250 ரன்களுக்கு அனைத்து விக்கெட்டுகளையும் இழந்தது. ஆஸி. தரப்பில் கம்மின்ஸ் 4 விக்கெட்டுகளை வீழ்த்தினார்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai