தென் ஆப்பிரிக்க கிரிக்கெட் அணியின் முன்னாள் கேப்டன் கிரீம் ஸ்மித், 2-வது முறையாகத் திருமணம் செய்து கொண்டுள்ளார்.
2011-ல் ஐயர்லாந்து பாடகி மார்கன் டீனைத் திருமணம் செய்தார் ஸ்மித். இருவருக்கும் ஒரு மகன், மகள் உண்டு. எனினும் நான்கு வருடத்துக்குப் பிறகு 2015-ல் இருவரும் விவாகரத்து பெற்றார்கள்.
பிறகு, ரோமியைக் காதலித்து வந்தார் ஸ்மித். ரோமிக்கும் முதல் திருமணம் மூலமாக இரு குழந்தைகள் உண்டு. 2016-ல் ரோமிக்கு ஆண் குழந்தை பிறந்தது. இந்நிலையில் 5 வருடக் காதலுக்குப் பிறகு, கடந்த நவம்பர் 2 அன்று ரோமியைத் திருமணம் செய்துகொண்டுள்ளார் 38 வயது ஸ்மித். இத்தகவலை அவர் ட்விட்டரில் வெளியிட்டுள்ளார். இத்திருமணத்துக்கு 5 குழந்தைகளும் வந்திருந்தார்கள்.
22 வயதில் கேப்டனான ஸ்மித், தென் ஆப்பிரிக்க கிரிக்கெட் அணியின் இளம் கேப்டன் என்கிற பெருமையை அடைந்தார். 117 டெஸ்டுகளில் விளையாடி, 9265 ரன்களை எடுத்தார்.