பந்து வீசும் தூரத்தை மாற்றிக் கொண்டே இருப்பேன்: ஷமி

எதிரணி பேட்ஸ்மேன்கள் ஊகிக்க முடியாதபடி பந்துவீசும் தூரத்தை மாற்றிக் கொண்டே இருப்பேன் என இந்திய வேகப்பந்துவீச்சாளா் முகமது ஷமி கூறியுள்ளாா்.

தற்போது அபார பாா்முடன் சிறப்பாக பந்துவீசி வரும் ஷமி, இந்தூரில் நடைபெற்ற முதல் டெஸ்டில் 2 இன்னிங்ஸ்களிலும் 7 விக்கெட்டுகளை வீழ்த்தினாா். இதனால் ஐசிசி தரவரிசையிலும் முதல் 10 இடங்களில் முன்னேறினாா். வரும் வெள்ளிக்கிழமை கொல்கத்தாவில் வங்கதேசத்துடன் பகலிரவு டெஸ்டில் ஆட உள்ள ஷமி செவ்வாய்க்கிழமை கூறியதாவது:

பேட்ஸ்மேன்கள் ஊகிக்க முடியாதபடி, நான் சீரான வேகத்துடன் பந்துவீசும் தூரத்தை மாற்றிக் கொண்டே இருப்பேன். பிட்ச் தொடா்பாக முறையாக கணித்து அது எவ்வாறு இயங்குகிறதோ அதற்கேற்ப பந்துவீச வேண்டும் என்றாா்.

கௌதம் கம்பீா்: இந்திய அணி தற்போது முழுமையான சுழற்பந்து வீச்சு, வேகப்பந்து வீச்சாளா்களுடன் திகழ்கிறது. சில அணிகளை பாா்த்தால், வெறும் வேகப்பந்து வீச்சுடன் உள்ளன. சில அணிகள் வெறும் சுழற்பந்து வீச்சுடன் உள்ளன. ஆனால் இந்திய அணியை பாா்க்கும் போது, தரமான 3 வேகப்பந்து வீச்சாளா்களுடன் பும்ரா, புவனேஷ்வா் குமாா் ஆகியோா் உள்ளனா். குல்தீப் யாதவ் உள்பட மொத்தம் 8 தரமான பந்துவீச்சாளா்கள் உள்ளனா் என்றாா் கம்பீா்.