இங்கிலாந்துக்கு எதிரான 2-வது டெஸ்டின் முதல் நாள் முடிவில் பாகிஸ்தான் அணி 5 விக்கெட் இழப்புக்கு 126 ரன்கள் எடுத்துத் தடுமாறி வருகிறது.
மேற்கிந்தியத் தீவுகள் அணிக்கு எதிரான டெஸ்ட் தொடரை 2-1 என வென்றது இங்கிலாந்து அணி. அடுத்ததாக பாகிஸ்தானுக்கு எதிரான டெஸ்ட் தொடரில் விளையாடி வருகிறது. பாகிஸ்தானுக்கு எதிரான முதல் டெஸ்டில் 3 விக்கெட் வித்தியாசத்தில் வென்றது இங்கிலாந்து அணி. 2-வது டெஸ்ட் செளதாம்ப்டனில் தொடங்கியுள்ளது.
டாஸ் வென்ற பாகிஸ்தான் அணி பேட்டிங்கைத் தேர்வு செய்துள்ளது. 11 வருடங்களுக்குப் பிறகு டெஸ்ட் அணியில் ஃபவாத் அலாம் இடம்பெற்றுள்ளார். சதாப் கான் அணியிலிருந்து நீக்கப்பட்டுள்ளார். இங்கிலாந்து அணியில் இரு மாற்றங்கள். ஸ்டோக்ஸ், ஆர்ச்சருக்குப் பதிலாக ஸாக் கிராவ்லி, சாம் கரண் ஆகியோர் இடம்பெற்றுள்ளார்கள்.
இந்நிலையில் முதல் நாளன்று இங்கிலாந்து அணியின் அற்புதமான பந்துவீச்சுக்கு ஈடுகொடுக்க முடியாமல் பாகிஸ்தான் பேட்ஸ்மேன்கள் தடுமாறினார்கள். மழையால் நேற்றைய ஆட்டம் பாதிக்கப்படாமல் இருந்திருந்தால் மேலும் பல விக்கெட்டுகளை பாகிஸ்தான் அணி இழந்திருக்கும்.
முதல் நாள் முடிவில் பாகிஸ்தான் அணி 45.4 ஓவர்களில் 5 விக்கெட் இழப்புக்கு 126 ரன்கள் எடுத்துத் தடுமாறி வருகிறது. ஆண்டர்சன் 2 விக்கெட்டுகளை வீழ்த்தினார்.