கடந்த வருடம் யு.எஸ். ஓபன் போட்டியை வென்ற பியான்கா ஆன்ட்ரிஸ்கு, இந்த வருட யு.எஸ். ஓபன் போட்டியில் பங்கேற்கவில்லை என அறிவித்துள்ளார்.
உலகையே அச்சுறுத்தி வரும் கரோனா நோய் தொற்றின் தாக்கம் காரணமாக டோக்கியோ ஒலிம்பிக்ஸ் போட்டி அடுத்த ஆண்டுக்கு ஒத்திவைக்கப்பட்டுள்ளது. இதுதவிர, அந்தந்த நாடுகளில் நடைபெற இருந்த பல்வேறு விளையாட்டுப் போட்டிகளும் ரத்து செய்யப்பட்டுள்ளன. இதனிடையே, விம்பிள்டன் போட்டி இந்த ஆண்டு வரும் ஜூன் 29 முதல் - ஜூலை 12-ஆம் தேதி வரை நடைபெறுவதாக இருந்தது. எனினும், கரோனாவை கட்டுப்படுத்த உலக நாடுகள் போராடி வரும் நிலையில் போட்டியை நடத்துவது தொடா்பாக கேள்வி எழுந்தது. இதையடுத்து இந்த வருட விம்பிள்டன் போட்டியை ரத்து செய்வதென முடிவெடுக்கப்பட்டது. மே 24- ஜூன் 7 தேதிகளில் நடைபெறவதாக இருந்த பிரெஞ்சு ஓபன் போட்டி செப்டம்பா் மாதத்துக்கு ஒத்திவைக்கப்பட்டுள்ளது.
இந்த வருட யு.எஸ். ஓபன் போட்டி காலி அரங்கில் ஆகஸ்ட் 31 முதல் செப்டம்பர் 13 வரை நடைபெறவுள்ளது. இப்போட்டியைக் காண ரசிகர்களுக்கு அனுமதி கிடையாது.
கரோனா அச்சுறுத்தல் காரணமாக யு.எஸ். ஓபன் டென்னிஸ் போட்டியிலிருந்து விலகுவதாக உலகின் நெ.1 வீராங்கனை ஆஷ்லி பார்டி சமீபத்தில் அறிவித்தார். இந்நிலையில் பிரபல வீரர் நடாலும் இந்த வருட யு.எஸ். ஓபன் டென்னிஸ் போட்டியிலிருந்து விலகியுள்ளார்.
கடந்த வருட யு.எஸ். ஓபன் போட்டியில் ஜாம்பவான் செரீனா வில்லியம்ஸை வீழ்த்தி பட்டம் வென்றார் 19 வயது கனடா வீராங்கனை பியான்கா ஆன்ட்ரிஸ்கு. இது அவருடைய முதல் கிராண்ட்ஸ்லாம் பட்டமாகும். 2000-ம் ஆண்டுகளில் பிறந்து கிராண்ட்ஸ்லாம் பட்டம் வென்ற முதல் வீராங்கனை என்கிற பெருமையையும் அடைந்தார்.
இந்நிலையில் இந்த வருட யு.எஸ். ஓபன் போட்டியில் தான் பங்கேற்கவில்லை என பியான்கா அறிவித்துள்ளார். கரோனா அச்சுறுத்தல் காரணமாக இந்த முடிவை எடுத்துள்ளதாக அவர் கூறியுள்ளார்.