டெஸ்ட் தொடருக்கு முன்பு, நியூஸிலாந்து ஏ அணிக்கு எதிராக இரு முறை டக் அவுட் ஆன மயங்க் அகர்வால்!

இந்திய டெஸ்ட் அணியின் தொடக்க வீரர் மயங்க் அகர்வால், நியூஸிலாந்து ஏ அணிக்கு எதிராக இருமுறை டக் அவுட் ஆகியுள்ளார். 

இந்தியா ஏ -நியூஸிலாந்து ஏ அணிகளுக்கு இடையிலான அதிகாரபூர்வமற்ற நான்கு நாள் டெஸ்ட் ஆட்டம், கிறைஸ்ட்சர்ச்சில் நடைபெற்று வருகிறது.

இந்திய ஏ அணி முதல் இன்னிங்ஸில் 216 ரன்களுக்கு அனைத்து விக்கெட்டுகளையும் இழந்தது. இதையடுத்து விளையாடிய நியூஸிலாந்து ஏ அணி, 2-ம் நாளின் முடிவில் 114 ஓவர்களில் 5 விக்கெட் இழப்புக்கு 385 ரன்கள் எடுத்தது.

3-ம் நாளில், 160.3 ஓவர்களில் 7 விக்கெட் இழப்புக்கு 562 ரன்கள் எடுத்து நியூஸிலாந்து ஏ அணி டிக்ளேர் செய்தது. விக்கெட் கீப்பர் கிளவர் 196 ரன்கள் எடுத்து ஆட்டமிழந்தார். சாப்மேன் 114 ரன்கள் எடுத்தார்.

இதையடுத்து விளையாடிய இந்திய ஏ அணியில் தொடக்க வீரர் மயங்க் அகர்வால், இந்தமுறையும் டக் அவுட் ஆகி வெளியேறினார். நியூஸி. ஏ அணிக்கு எதிரான இரு இன்னிங்ஸ்களிலும் டக் அவுட் ஆனது இந்திய நிர்வாகத்தைக் கவலை கொள்ள வைத்துள்ளது.

3-ம் நாளின் முடிவில், இந்திய ஏ அணி, 37 ஓவர்களில் 2 விக்கெட் இழப்புக்கு 127 ரன்கள் எடுத்துள்ளது. ப்ரியங் பஞ்சல் 67, ஷுப்மன் கில் 33 ரன்களுடன் களத்தில் உள்ளார்கள். 8 விக்கெட்டுகள் மீதமுள்ள நிலையில் இந்திய அணி 219 ரன்கள் பின்தங்கியுள்ளது.