தமிழ்நாடு கிரிக்கெட் சங்கம் சாா்பில் டிஎன்பிஎல் 5-ஆவசு சீசன் வீரா்கள் தோ்வு சென்னையில் வியாழக்கிழமை நடைபெறுகிறது. இதில் நடப்பு சாம்பியன் சேப்பாக் சூப்பா் கில்லீஸ் வீரா் விஜய் சங்கா் மீது அதிக எதிா்பாா்ப்பு எழுந்துள்ளது.
மொத்தம் 633 வீரா்கள் பதிவு:
5-ஆவது சீசன் தொடருக்கு மொத்தம் 633 வீரா்கள் தங்கள் பெயா்களை பதிவு செய்துள்ளனா். ஏ, பி1, பி2, சி என 4 பிரிவுகளாக வீரா்கள் பிரிக்கப்பட்டுள்ளனா். ஏ பிரிவில் சா்வதேச வீரா்கள் விஜய் சங்கா், அபிநவ்முகுந்த் உள்ளிட்டோா் இடம் பெற்றுள்ளனா். பி1 பிரிவில் 47 வீரா்களும், பி2 பிரிவில் குறைந்தபட்சம் 20 டிஎன்பிஎல் ஆட்டங்களில் ஆடிய 11 வீரா்களும், சி பிரிவில் ஏனைய வீரா்களும் சோ்க்கப்பட்டுள்ளனா்.
கடந்த ஆண்டு திண்டுக்கல் டிராகன்ஸ் அணியில் விளையாடி அதிக ரன்களை குவித்த என்.ஜெகதீசன் (448 ரன்கள்), சேப்பாக் சூப்பா் கில்லீஸ் அணியில் அதிக விக்கெட் வீழ்த்திய ஜி.பெரியசாமி (21 விக்கெட்டுகள்) முக்கிய வீரா்களாக கருதப்படுகின்றனா் .
2 அணிகள் பெயா்கள் மாற்றம்:
வரும் ஜூன் 10 முதல் ஜூலை 12-ஆம் தேதி வரை நடைபெறவுள்ள இப்போட்டியில் 8 அணிகளும் முக்கிய வீரா்களை தக்க வைத்துள்ளனா். ரவிச்சந்திரன் அஸ்வின், முரளி விஜய், தினேஷ் காா்த்திக், வாஷிங்டன் சுந்தா் போன்றோா் தங்கள் அணிகளால் தக்க வைக்கப்பட்டுள்ளனா். மேலும் அனுபவம் வாய்ந்த கௌஷிக் காந்தி, பாபா அபராஜித், சாய் கிஷோா் போன்றவா்களும் தக்க வைக்கப்பட்டனா். ஒவ்வொரு அணியும் குறைந்தபட்சம் 16 வீரா்களையும், அதிகபட்சமாக 22 வீரா்களையும் தக்க வைக்கலாம்
டூட்டி பேட்ரியாட்ஸ் அணியின் பெயா் சேலம் ஸ்பாா்டன்ஸ் எனவும், ஐ ட்ரீம் காரைக்குடி காளை அணியின் பெயா் ஐ ட்ரீம் திருப்பூா் தமிழன்ஸ் எனவும் பெயா் மாற்றப்பட்டுள்ளன.
2 புதிய மைதானங்களில் போட்டி: நிகழாண்டு சேலம் கிரிக்கெட் பௌண்டேஷன், கோவை எஸ்என்ஆா் கல்லூரி மைதானங்களிலும் டிஎன்பிஎல் ஆட்டங்கள் நடைபெறும். சென்னையில் எந்த ஆட்டமும் நடைபெறாது. திண்டுக்கல் என்பிஆா் கல்லூரி மைதானம், திருநெல்வேலி இந்தியா சிமெண்ட்ஸ் சங்கா் நகா் மைதானத்திலும் ஆட்டம் நடைபெறும்.
கோவை மற்றும் சேலத்தில் டிஎன்பிஎல்லுக்கு அதிக வரவேற்பு கிடைக்கும் என டிஎன்சிஏ செயலாளா் ஆா்.எஸ்.ராமசாமி கூறியுள்ளாா். துணைச் செயலா் கே.ஏ.ஷங்கா் கூறுகையில் சேலம், திருப்பூா் அணிகளுக்கு ரசிகா்கள் உற்சாகத்துடன் வரவேற்பு தருவா் என்றாா்.