இந்திய அணி நியூஸிலாந்துக்குச் சுற்றுப்பயணம் செய்து 5 டி20, 3 ஒருநாள், 2 டெஸ்டுகளில் விளையாடுகிறது. டி20 தொடர் ஆக்லாந்தில் நாளை தொடங்குகிறது.
இந்நிலையில் டி20 ஆட்டத்திலும் கே.எல். ராகுல் விக்கெட் கீப்பராகச் செயல்படுவார் என இந்திய கேப்டன் விராட் கோலி கூறியுள்ளார். செய்தியாளர்களிடம் இன்று அவர் கூறியதாவது:
ஒருநாள் ஆட்டங்களில் ராஜ்கோட்டில் என்ன திட்டமிட்டோமோ அதையே இங்கும் செயல்படுத்துவோம். புதிய தொடக்க வீரர் விளையாடுவார், ராகுல் 5-ம் நிலை வீரராக விளையாடுவார். டி20 கிரிக்கெட்டில் கொஞ்சம் மாறுபடும். அதில் ராகுல் தொடக்க வீரராக விளையாடுவார்.
ராகுல் விக்கெட் கீப்பராக நன்குச் செயல்படுவதால் கூடுதலாக ஒரு பேட்ஸ்மேனை அணியில் சேர்க்க முடிகிறது. அவர் நன்றாக பேட்டிங் செய்து, நன்கு கீப்பிங் செய்கிறபோது இதை நாங்கள் ஏன் செயல்படுத்தக்கூடாது? இதைச் சிறிது காலத்துக்குத் தொடரவுள்ளோம். யாரிடம் இருந்தும் எதையும் பறிக்கவில்லை. இதுதான் அணிக்குச் சிறந்த முடிவாக உள்ளது என்று கூறியுள்ளார்.