கரோனா வைரஸ் நோய்த் தொற்று தடுப்பு நடவடிக்கையின் ஒரு பகுதியாக காவல் பாதுகாப்புப் பணிகளில் ஈடுபட்டு வரும் கால்பந்து வீராங்கனை இந்துமதிக்கு விளையாட்டுத் துறை அமைச்சர் உள்ளிட்ட பலரும் பாராட்டு தெரிவித்துள்ளார்கள்.
2014 முதல் இந்திய அணிக்காக விளையாடி வரும் 25 வயது இந்துமதி கதிரேசன் இதுவரை 34 ஆட்டங்களில் இடம்பெற்று 12 கோல்களை அடித்துள்ளார்.
2018-ல் ஒடிஷாவில் நடைபெற்ற சீனியர் மகளிர் கால்பந்து போட்டியில் கடலூர் மாவட்டத்தைச் சேர்ந்த இந்துமதி தலைமையில் தமிழக அணி முதல்முறையாக சாம்பியன் பட்டம் வென்றது. 10 கோல்கள் அடித்து இப்போட்டியின் சிறந்த வீராங்கனையாகவும் இந்துமதி தேர்வானார்.
சர்வதேசக் கால்பந்து வீராங்கனையான இந்துமதி, சென்னை மாவட்ட காவல்துறையில் உதவி ஆய்வாளராகப் பணியாற்றி வருகிறார். இந்நிலையில் தற்போது சென்னை அண்ணா நகரில் கரோனா தடுப்புப் பாதுகாப்புப் பணியில் மும்முரமாக ஈடுபட்டு வருகிறார். முகக்கவசம் அணிந்து அவர் பணியாற்றும் புகைப்படங்கள் சமூகவலைத்தளங்களில் வெளியாகியுள்ளன.
தன்னுடைய பணி குறித்து இந்துமதி கதிரேசன் கூறியதாவது:
இது அனைவருக்கும் கடினமான நேரம். பாதுகாப்பு வழிமுறைகளை அனைவரும் கடைப்பிடிப்பதை உறுதி செய்வதே என் பணி. பாதுகாப்புப் பணியைத் தாண்டி என்னால் வேறு வேலைகளைச் செய்ய முடியவில்லை. குடும்பத்துடன் நேரம் செலவழிக்க முடியவில்லை. சிலசமயம் இரவு நேரங்களில் பணியாற்ற வேண்டிய நிலைமையும் வரும். கரோனா பாதுகாப்புப் பணியில் ஈடுபடுவது மூலம் இக்கட்டான சமயத்தில் நாட்டின் நன்மைக்காக உழைப்பதைப் பெருமையாகக் கருதுகிறேன் என்று கூறியுள்ளார்.
சமூகவலைத்தளங்களின் வெளியான இந்துமதியின் புகைப்படங்களைக் கண்டு மத்திய விளையாட்டுத் துறை அமைச்சா் கிரண் ரிஜிஜு, ட்விட்டரில் தெரிவித்ததாவது:
இந்திய அணிக்காக விளையாடும் இந்துமதி, கரோனா பாதுகாப்புப் பணியில் ஈடுபடுவதைக் கண்டு பெருமிதம் அடைகிறேன் என்று கூறியுள்ளார்.
