இந்தியாவுக்கு எதிரான டெஸ்ட் தொடரில் பெர்த் மைதானத்துக்கு ஒரு டெஸ்ட் வழங்கப்படாததற்கு கிரிக்கெட் ஆஸ்திரேலியாவின் தலைமை நிர்வாகி கெவின் ராபர்ட்ஸ் விளக்கம் அளித்துள்ளார்.
இந்திய அணியின் ஆஸ்திரேலியச் சுற்றுப்பயணத்துக்கான அட்டவணையை அதிகாரபூர்வமாக வெளியிட்டுள்ளது கிரிக்கெட் ஆஸ்திரேலியா.
2020-21 சீஸனுக்காக அட்டவணையை கிரிக்கெட் ஆஸ்திரேலியா வெளியிட்டுள்ளது. ஆகஸ்ட் மாதம் ஜிம்பாப்வே அணிக்கு எதிராக 3 ஒருநாள் ஆட்டங்கள் கொண்ட ஒருநாள் தொடரில் ஆஸ்திரேலிய அணி பங்கேற்கிறது. ஆகஸ்ட் 9 முதல் ஆகஸ்ட் 15 வரை இத்தொடர் நடைபெறுகிறது.
அக்டோபர் 4-9 வரை மேற்கிந்தியத் தீவுகள் அணிக்கு எதிராக 3 ஆட்டங்கள் டி20 தொடர் நடைபெறுகிறது. நவம்பரில் ஆப்கானிஸ்தானுக்கு எதிராக ஒரு டெஸ்ட் ஆட்டமும் ஜனவரியில் நியூசிலாந்துக்கு எதிராக ஒருநாள், டி20 தொடர்கள் நடைபெறுகின்றன. இந்த அட்டவணையில் அக்டோபர் 18 முதல் நவம்பர் 15 வரையிலான டி20 உலகக் கோப்பையும் இடம்பெற்றுள்ளது.
இந்திய அணி டி20 உலகக் கோப்பைப் போட்டிக்கு முன்பு ஆஸ்திரேலிய அணிக்கு எதிரான 3 ஆட்டங்கள் கொண்ட டி20 தொடரில் பங்கேற்கிறது. டிசம்பர் 3 முதல் ஜனவரி 7 வரை இரு அணிகளுக்கு இடையிலான 4 ஆட்டங்கள் கொண்ட டெஸ்ட் தொடர் நடைபெறுகிறது. அதன்பின்னர் ஜனவரி மாதம் 3 ஆட்டங்கள் கொண்ட ஒருநாள் தொடரில் இரு அணிகளும் பங்கேற்கின்றன.
கரோனா அச்சுறுத்தல் காரணமாக இந்த அட்டவணைகள் மாறுதலுக்கு உட்பட்டவை என கிரிக்கெட் ஆஸ்திரேலியா தெரிவித்துள்ளது.
இந்தியாவுக்கு எதிரான டெஸ்ட் தொடரில் பெர்த் மைதானம் வாய்ப்பை இழந்திருப்பது சர்ச்சையை ஏற்படுத்தியுள்ளது. இந்தியாவுக்கு எதிரான டெஸ்ட் ஆட்டத்தைத் தங்களுக்கு வழங்காததற்கு பெர்த் மைதானத்தை நிர்வகிக்கும் தி வெஸ்டர்ன் ஆஸ்திரேலியன் கிரிக்கெட் அமைப்பு கண்டனம் தெரிவித்துள்ளது. பெர்த்தில் WACA, பெர்த் என இரு கிரிக்கெட் மைதானங்கள் உள்ளன. இதில் பெர்த் மைதானம் சமீபத்தில் கட்டப்பட்டதாகும். கடந்த இரு சீஸன்களாக இந்தியா, நியூசிலாந்து அணிகளுக்கு எதிரான டெஸ்ட் ஆட்டங்கள் பெர்த் மைதானத்தில் நடைபெற்றுள்ளன. ஆனால், இந்தமுறை இந்தியாவுக்கு எதிரான டெஸ்ட் ஆட்டம் கிடைக்கவில்லை. அதற்குப் பதிலாக ஆஸ்திரேலியா - ஆப்கானிஸ்தான் அணிகள் மோதும் டெஸ்ட் ஆட்டம் பெர்த் மைதானத்தில் நவம்பர் 21-25 தேதிகளில் நடைபெறவுள்ளது.
கிரிக்கெட் ஆஸ்திரேலியாவின் இந்த முடிவுக்கு எதிர்ப்பு தெரிவித்து தி வெஸ்டர்ன் ஆஸ்திரேலியன் கிரிக்கெட் அமைப்பின் சேர்மன் டெரி வால்டிரான் கூறியதாவது:
கிரிக்கெட் ஆஸ்திரேலியாவின் முடிவு எங்களுக்கு வேதனையைத் தந்துள்ளது. இது தவறான முடிவு எனக் கருதுகிறோம். எதனால் இந்த முடிவை எடுத்தார்கள் என எங்களால் புரிந்துகொள்ள முடியவில்லை. உலகின் மிகச்சிறந்த மைதானங்களில் ஒன்றை நாங்கள் வைத்துள்ளோம். சிறந்த 2-வது கிரிக்கெட் மைதானமும் இதுதான். இந்திய ரசிகர்களுக்கான செளகரியமான நேரமும் பெர்த்தில் உள்ளது. எதனால் இப்படி ஒரு முடிவு? இருந்தும் நாங்கள் தொடர்ந்து கிரிக்கெட் ஆஸ்திரேலியாவுக்கு அழுத்தம் கொடுப்போம். பிரிஸ்பேனை விடவும் எங்களுடைய மைதானம் சிறந்தது என்பதைக் கடந்த சில வருடங்களில் நிரூபித்துள்ளோம். எங்களுடைய கிரிக்கெட் மைதானத்துக்காக 10,000 உறுப்பினர்கள் ஆதரவளிக்கிறார்கள். அவர்களுக்கு நெ.1 டெஸ்ட் அணிக்கு எதிரான டெஸ்ட் ஆட்டத்தை எங்களால் வழங்க முடியவில்லை. ரசிகர்களை மனத்தில் கொண்டு இந்த முடிவை எடுத்திருக்க வேண்டும். இந்தச் செய்தியை ஏற்றுக்கொள்ள சில நாள்களாகும். எனினும் எங்களுக்கு மேலே இந்திய கிரிக்கெட் அணியின் விமானம் வேறொரு பக்கத்துக்குப் பறந்து செல்லும்போது சிறிது கண்ணீர் விடுவோம் என்றார்.
இந்நிலையில் இந்தியாவுக்கு எதிரான டெஸ்ட் தொடரில் பெர்த் மைதானத்துக்கு ஒரு டெஸ்ட்டும் வழங்கப்படாததற்கு கிரிக்கெட் ஆஸ்திரேலியாவின் தலைமை நிர்வாகி கெவின் ராபர்ட்ஸ் விளக்கம் அளித்துள்ளார். அவர் கூறியதாவது:
இந்தியா டெஸ்ட் போட்டி பெர்த் மைதானத்துக்கு வழங்கப்பட்டிருந்தால் எட்டு வருட இடைவெளியில் நான்கு டெஸ்டுகளை அது நடத்தியிருக்கும். இங்கிலாந்து மற்றும் இந்தியாவுக்கு எதிராகத் தலா 2 டெஸ்டுகள். ஆனால் பிரிஸ்பேன் 2 டெஸ்டுகள் மட்டுமே நடத்தியிருக்கும். அது சரியாக இருக்காது. குயின்ஸ்லாந்து பகுதி ரசிகர்களுக்கு முக்கியமான டெஸ்ட் போட்டி வழங்குவது என்பது தேசிய நலனைக் கருத்தில் கொண்டு எடுக்கப்பட்ட முடிவு. அதுதான் சரியான தீர்வாகவும் இருக்கும். பிரிஸ்பேனுக்கு டெஸ்ட் போட்டி வழங்குவதன் மூலம் எட்டு வருடக் காலக்கட்டத்தில் பெர்த், பிரிஸ்பேன் என இரு மைதானங்களும் தலா 3 டெஸ்டுகளை நடத்தும் என்றார்.
இந்திய அணியின் ஆஸ்திரேலியச் சுற்றுப்பயணம்
டி20 தொடர்
முதல் டி20: அக்டோபர் 11, பிரிஸ்பேன்
2-வது T20: அக்டோபர் 14, கான்பெர்ரா
3-வது T20: அக்டோபர் 17, அடிலெய்ட்
டெஸ்ட் தொடர்
முதல் டெஸ்ட்: டிசம்பர் 3-7, பிரிஸ்பேன்
2-வது டெஸ்ட்: டிசம்பர் 11-15, அடிலெய்ட் (பகலிரவு)
3-வது டெஸ்ட்: டிசம்பர் 26-30, மெல்போர்ன்
4-வது டெஸ்ட்: ஜனவரி 3-7, சிட்னி
ஒருநாள் தொடர்
முதல் ஒருநாள்: ஜனவரி 12, பெர்த்
2-வது ஒருநாள்: ஜனவரி 15, மெல்போர்ன்
3-வது ஒருநாள்: ஜனவரி 17, சிட்னி