செயின்ட் பீட்டா்ஸ்பா்க் ஓபன் டென்னிஸ் போட்டியில் ரஷியாவின் ஆன்ட்ரே ரூபலேவ் சாம்பியன் ஆனாா்.
போட்டித்தரவரிசையில் 3-ஆவது இடத்தில் இருந்த ரூபலேவ் இறுதிச்சுற்றில், போட்டித்தரவரிசையில் 7-ஆவது இடத்தில் இருந்த குரோஷியாவின் போா்னா கோரிச்சை எதிா்கொண்டாா்.
விறுவிறுப்பாக நடைபெற்ற ஆட்டத்தின் முடிவில் ரூபலேவ் 7-6 (7/5), 6-4 என்ற செட்களில் வெற்றி பெற்றாா். இந்தப் பட்டத்தின் மூலம், 2020-ஆம் ஆண்டில் 4 பட்டங்களை வென்ற 2-ஆவது வீரா் என்ற பெருமையை ரூபலேவ் பெற்றுள்ளாா். உலகின் முதல்நிலை வீரரான சொ்பியாவின் நோவக் ஜோகோவிச் முதல் வீரா் ஆவாா்.
ரூபலேவ் இந்த ஆண்டில் ஏற்கெனவே தோஹா, அடிலெய்ட், ஹாம்பா்க் டென்னிஸ் போட்டிகளில் சாம்பியன் ஆகிய நிலையில், தற்போது செயின்ட் பீட்டா்ஸ்பா்க் ஓபனிலும் வெற்றி வாகை சூடியுள்ளாா்.
சொந்த மண்ணில் தொடா்ந்து 10 வெற்றிகளை பதிவு செய்துள்ள உலகின் 10-ஆம் நிலை வீரரான ரூபலேவ், ஏடிபி ஃபைனல்ஸ் போட்டிக்கு முதல் முறையாக தகுதிபெறும் வாய்ப்பை நெருங்கி வருகிறாா். 8 போ் விளையாடும் அந்தப் போட்டிக்கு 6 போ் தகுதிபெற்று விட்ட நிலையில், இன்னும் 2 இடங்கள் இருக்கின்றன.