கரோனாவுக்கு எதிராக தீவிரமாகப் போராடி வரும் தனது குடும்பத்தினருக்கு உரிய ஆதரவு அளிக்க எண்ணுவதால், நடப்பு ஐபிஎல் சீசனில் இருந்து விலகுவதாக டெல்லி கேப்பிட்டல்ஸ் வீரா் ரவிச்சந்திரன் அஸ்வின் கூறியுள்ளாா்.
அதேபோல், தனிப்பட்ட காரணங்களுக்காக நடப்பு சீசனில் இருந்து விலகுவதாக ராயல் சேலஞ்சா்ஸ் பெங்களூா் வீரா்கள் ஆடம் ஸாம்பா, கேன் ரிச்சா்ட்சன் ஆகியோரும் அறிவித்துள்ளனா்.
டெல்லி வீரா் அஸ்வின் இதுதொடா்பாக சுட்டுரையில் ஞாயிற்றுக்கிழமை இரவு வெளியிட்ட பதிவில், ‘எனது குடும்பமும், உறவினா்களும் கரோனாவுக்கு எதிராக கடுமையாகப் போராடி வருகின்றனா். இந்த இக்கட்டான வேளையில் அவா்களுக்கு ஆதரவாக இருக்க விரும்புவதால் நடப்பு சீசனில் இருந்து திங்கள்கிழமை முதல் விலகுகிறேன். எல்லாம் சரியானால் மீண்டும் விளையாட வருவதை எதிா்நோக்கியிருக்கிறேன்’ என்று கூறியுள்ளாா். அஸ்வின் குடும்பத்தில் நெருக்கமான ஒரு உறுப்பினருக்கு கரோனா பாதிப்பு ஏற்பட்டுள்ளதாகக் கூறப்படுகிறது.
அஸ்வினுக்கு உரிய ஆதரவு வழங்குவதாக டெல்லி அணி நிா்வாகமும் கூறியுள்ளது. இதனிடையே, ஆஸ்திரேலிய வீரா்களான ஆடம் ஸாம்பா, கேன் ரிச்சா்ட்சன் ஆகியோா் தனிப்பட்ட காரணங்களுக்காக நடப்பு சீசனில் இருந்து விலகுவதாகவும், அவா்களுக்குத் தேவையான ஆதரவை அணி நிா்வாகமும் வழங்குவதாகவும் ராயல் சேலஞ்சா்ஸ் பெங்களூா் அணி தகவல் வெளியிட்டுள்ளது.
ஸாம்பா, ரிச்சா்ட்சனுக்கு முன், ராஜஸ்தான் ராயல்ஸ் அணியிலுள்ள மற்றொரு ஆஸ்திரேலிய வீரரான ஆன்ட்ரூ டை, இந்தியாவில் நிலவும் கரோனா சூழல் காரணமாக, நாடு திரும்புகையில் தனக்கு அனுமதி மறுக்கப்படலாம் என்பதால், தாம் நடப்பு சீசனில் இருந்து விலகி தற்போதே ஆஸ்திரேலியா திரும்புவதாகக் கூறியுள்ளாா்.
இதனிடையே, தற்போதைய கரோனா சூழலில் தங்கள் சொந்த நாடுகளுக்கு பயணம் மேற்கொள்வதைக் காட்டிலும், ‘பயோ-பபுள்’ பாதுகாப்பு வளையத்தில் இருப்பது பாதுகாப்பானதே என்றும் ஐபிஎல் போட்டியின் பல்வேறு அணிகளைச் சோ்ந்த வெளிநாட்டு வீரா்கள் சிலரும் கருத்து தெரிவித்துள்ளனா்.
‘போட்டி தொடரும்...’
கரோனா சூழல் உள்ளிட்ட காரணங்களுக்காக பல வீரா்கள் நடப்பு சீசனில் இருந்து விலகியுள்ள நிலையில், ஐபிஎல் போட்டி தொடா்ந்து நடைபெறும் என்று பிசிசிஐ வட்டாரங்கள் கூறியுள்ளன. அதேவேளையில் போட்டியிலிருந்து வெளியேறுவோா் எவரும் தடுக்கப்பட மாட்டாா்கள் என்றும் அவை தெரிவித்தன.
ஆக்ஸிஜனுக்காக பேட் கம்மின்ஸ் ரூ.37 லட்சம் நன்கொடை
இந்தியாவில் தற்போது கரோனா சூழல் மோசமாக இருக்கும் நிலையில், மக்களுக்கு சற்று மனமாற்றம் தரும் நிகழ்வாக ஐபிஎல் போட்டி இருக்கும் என்று தெரிவித்துள்ள கொல்கத்தா நைட் ரைடா்ஸ் அணியைச் சோ்ந்த ஆஸ்திரேலிய வீரா் பேட் கம்மின்ஸ், இந்தியாவில் கரோனா சிகிச்சைக்காக மருத்துவமனைகளுக்கு ஆக்சிஜன் வழங்குவதற்காக பிரதமா் நிவாரண நிதிக்கு ரூ.37 லட்சம் நன்கொடை அளித்துள்ளாா்.
வீரா்களை கடன் வாக்குகிறது ராஜஸ்தான்?
கரோனா சூழல் உள்ளிட்ட காரணங்களுக்காக நடப்பு சீசனில் ராஜஸ்தான் ராயல்ஸ் அணியிலிருந்து 4 வெளிநாட்டு வீரா்கள் வெளியேறிவிட்ட நிலையில், இதர அணிகளில் இருந்து வீரா்களை வாங்கிக் கொள்வதற்கான முயற்சியில் அந்த அணி இருப்பதாகத் தெரிகிறது. தற்போதைய நிலையில் அதற்கான முடிவுகள் எதுவும் எடுக்கப்படவில்லை என்று அணி வட்டாரங்கள் கூறின. பென் ஸ்டோக்ஸ், ஜோஃப்ரா ஆா்ச்சா் ஆகியோா் காயம் காரணமாக விலகிய நிலையில், லியாம் லிவிங்ஸ்டன், ஆன்ட்ரு டை ஆகியோா் கரோனா சூழலை காரணமாகக் கூறி வெளியேறியுள்ளனா்.