இந்தியா - தென்னாப்பிரிக்கா அணிகளுக்கு இடையிலான முதல் டெஸ்டின் 2-வது நாள் ஆட்டம் மழை காரணமாக ஒரு ஓவர் கூட வீசப்படாமல் கைவிடப்பட்டது.
தென்னாப்பிரிக்காவுக்கு எதிரான முதல் டெஸ்டின் முதல் நாளில் கே.எல். ராகுலின் சதத்தால் இந்திய அணி 3 விக்கெட் இழப்புக்கு 272 ரன்கள் எடுத்து ஆதிக்கம் செலுத்தியது.
இந்திய அணி தென்னாப்பிரிக்காவில் 3 டெஸ்ட், 3 ஒருநாள் ஆட்டங்களில் விளையாடுகிறது. தெ.ஆ. அணிக்கு எதிரான டெஸ்ட் தொடர் டிசம்பர் 26 அன்றும் ஒருநாள் தொடர் ஜனவரி 19 அன்றும் தொடங்குகின்றன. ஒமைக்ரான் தொற்று பாதிப்பால் டி20 தொடா் ஒத்தி வைக்கப்பட்ட நிலையில், ஒருநாள் மற்றும் டெஸ்ட் ஆட்டங்கள் நடைபெறுகின்றன. ஒருநாள் அணியின் கேப்டன் பொறுப்பில் இருந்து நீக்கப்பட்ட விராட் கோலி, டெஸ்ட் அணியின் கேப்டனாக நீடிக்கிறாா். டெஸ்ட் அணியின் துணை கேப்டனாக அறிவிக்கப்பட்ட ரோஹித் சா்மா, காயத்தால் இடம் பெறவில்லை. கே.எல். ராகுல் டெஸ்ட் அணியின் துணை கேப்டனாக அறிவிக்கப்பட்டுள்ளார்.
முதல் டெஸ்ட், செஞ்சுரியனில் ஞாயிற்றுக்கிழமை தொடங்கியது. டாஸ் வென்ற இந்திய அணி கேப்டன் விராட் கோலி, பேட்டிங்கைத் தேர்வு செய்தார்.
முதல் நாள் முடிவில் இந்திய அணி 3 விக்கெட் இழப்புக்கு 272 ரன்கள் எடுத்து ஆதிக்கம் செலுத்தியுள்ளது. துணை கேப்டன் ராகுல் 122, ரஹானே 40 ரன்களுடன் களத்தில் உள்ளார்கள். ராகுல் 1 சிக்ஸரும் 17 பவுண்டரிகளும் அடித்துள்ளார். தொடக்க வீரர் மயங்க் அகர்வால் 60 ரன்களும் கோலி 35 ரன்களும் எடுத்தார்கள். தெ.ஆ. வேகப்பந்து வீச்சாளர் லுங்கி என்கிடி 3 விக்கெட்டுகளையும் எடுத்துள்ளார்.
இந்நிலையில் 2-வது நாளான இன்று மழையால் ஆட்டம் பாதிக்கப்பட்டுள்ளது. காலையிலிருந்து தொடர்ந்து மழை பெய்ததால் உணவு இடைவேளை ஒரு மணி நேரத்துக்கு முன்பே அறிவிக்கப்பட்டது. நடுவில் மழை நின்றாலும் அது நீண்ட நேரம் நீடிக்கவில்லை. மதியம் 12 மணிக்கு மழை நின்று வெயில் அடித்தது. இதனால் அடுத்த ஒரு மணி நேரத்தில் ஆட்டம் தொடங்கும் என எதிர்பார்க்கப்பட்டது. ஆனால் மதியம் 12.30 மணிக்கு மீண்டும் மழை பெய்ய ஆரம்பித்தது. மதியம் 1.50 மணிக்கு மழை நின்றாலும் இன்று ஆட்டத்தைத் தொடங்க முடியாத நிலையில் மைதானம் இருந்ததால் 2-வது நாள் ஆட்டம் கைவிடப்பட்டதாக அறிவிக்கப்பட்டது.