இந்தியாவுக்கு எதிரான முதல் டெஸ்டில் இங்கிலாந்து கேப்டன் ஜோ ரூட், இரட்டைச் சதம் எடுத்துள்ளார்.
இங்கிலாந்து கிரிக்கெட் அணி, இந்தியாவில் சுற்றுப்பயணம் செய்து 4 ஆட்டங்கள் கொண்ட டெஸ்ட் தொடரில் விளையாடுகிறது. இதில் முதல் டெஸ்ட் சென்னை சேப்பாக்கம் எம்.ஏ. சிதம்பரம் மைதானத்தில் நேற்று தொடங்கியுள்ளது.
இந்திய அணி, ஆஸ்திரேலிய மண்ணில் ஆஸ்திரேலியாவுக்கு எதிரான டெஸ்ட் தொடரை 2-1 என்ற கணக்கில் வென்ற கையோடு இந்தத் தொடரில் களமிறங்குகிறது. அதேநேரத்தில் இங்கிலாந்து அணி, இலங்கைக்கு எதிரான டெஸ்ட் தொடரை 2-0 என்ற கணக்கில் வென்ற நிலையில் இந்திய அணியை எதிா்கொள்கிறது. இரு அணிகளுமே வலுவான வீரா்களைக் கொண்டுள்ளதால் இந்த டெஸ்ட் தொடா் மீது மிகுந்த எதிா்பாா்ப்பு நிலவுகிறது.
இந்நிலையில் டாஸ் வென்ற இங்கிலாந்து அணி பேட்டிங்கைத் தேர்வு செய்தது. முதல் நாள் முடிவில் இங்கிலாந்து அணி 3 விக்கெட் இழப்புக்கு 263 ரன்கள் எடுத்தது. ஜோ ரூட் 128 ரன்களுடன் களத்தில் இருந்தார்கள்.
சேப்பாக்கம் ஆடுகளம் இன்றும் பேட்டிங்குக்குச் சாதகமாக இருந்ததால் கவலையின்றி விளையாடினார்கள் இங்கிலாந்து பேட்ஸ்மேன்களான ஜோ ரூட்டும் பென் ஸ்டோக்ஸும். சில கேட்சுகளை இந்திய வீரர்கள் நழுவவிட்டாலும் ரன்கள் குவிப்பதில் சிரமம் எதுவும் அவர்களுக்கு ஏற்படவில்லை. பென் ஸ்டோக்ஸ் அதிரடியாக விளையாடி ரன்கள் சேர்த்தார். 260 பந்துகளில் ஜோ ரூட், 150 ரன்களை எட்டினார். கடந்த மூன்று டெஸ்டுகளிலும் அவர் 150 ரன்களைக் கடந்து சாதனை செய்துள்ளார். பென் ஸ்டோக்ஸ், 73 பந்துகளில் அரை சதம் எட்டினார். 2 சிக்ஸர்களையும் அவர் அடித்தார்.
2-ம் நாள் மதிய உணவு இடைவேளையின்போது இங்கிலாந்து அணி 119 ஓவர்களில் 3 விக்கெட் இழப்புக்கு 355 ரன்கள் எடுத்தது. இங்கிலாந்து கேப்டன் ஜோ ரூட் 156 ரன்கள், பென் ஸ்டோக்ஸ் 63 ரன்களுடன் களத்தில் இருந்தார்கள்.
உணவு இடைவேளைக்குப் பிறகும் விரைவாக ரன்கள் எடுத்த ஸ்டோக்ஸ், நதீம் பந்துவீச்சில் புஜாராவிடம் கேட்ச் கொடுத்து 82 ரன்களில் ஆட்டமிழந்தார். இதன்பிறகு வழக்கம்போல தனது ஆட்டத்தை வெளிப்படுத்திய ஜோ ரூட், 195 ரன்களில் இருந்தபோது அஸ்வின் பந்தில் சிக்ஸர் அடித்து இரட்டைச் சதம் எடுத்தார். 341 பந்துகளில் 2 சிக்ஸர்கள், 19 பவுண்டரிகளுடன் இரட்டைச் சதம் எடுத்துள்ளார்.
இது ரூட்டின் 5-வது டெஸ்ட் இரட்டைச் சதமாகும். கேப்டனாக 3-வது இரட்டைச் சதம். 100-வது டெஸ்டில் இரட்டைச் சதம் எடுத்த முதல் வீரர் என்கிற பெருமையை அவர் அடைந்துள்ளார். இலங்கையில் இரட்டைச் சதம் எடுத்த ரூட், இந்தியாவிலும் இரட்டைச் சதம் எடுத்துள்ளார். இதனால் 23 நாள்களில் இரு இரட்டைச் சதம் எடுத்து மகத்தான வீரராக விளங்குகிறார்.
இங்கிலாந்து அணி 2-ம் நாள் தேநீர் இடைவேளையின்போது 147 ஓவர்களில் 4 விக்கெட் இழப்புக்கு 454 ரன்கள் எடுத்து விளையாடி வருகிறது. ரூட் 209, போப் 24 ரன்களுடன் களத்தில் உள்ளார்கள்.