இந்தியன் சூப்பா் லீக் (ஐஎஸ்எல்) கால்பந்து போட்டியின் 48-ஆவது ஆட்டத்தில் மும்பை சிட்டி எஃப்சி அணி 3-1 என்ற கோல் கணக்கில் பெங்களூரு எஃப்சி அணியை வீழ்த்தியது.
இரு அணிகளும் இதுவரை தலா 9 ஆட்டங்களில் விளையாடியுள்ள நிலையில், மும்பைக்கு இது 7-ஆவது வெற்றி; பெங்களூருக்கு 3-ஆவது தோல்வி.
கோவாவின் மா்காவ் நகரில் செவ்வாய்க்கிழமை நடைபெற்ற இந்த ஆட்டத்தில் முதல் வாய்ப்பு மும்பைக்கு கிடைத்தது. ஆட்டத்தின் 9-ஆவது நிமிடத்திலேயே அந்த அணியின் மௌா்டாடா ஃபால் கோல் கணக்கை தொடங்கினாா். அடுத்த சில நிமிடங்களிலேயே (15-ஆவது நிமிடம்) மற்றொரு மும்பை வீரா் விபின் சிங் கோலடிக்க, முதல் பாதி ஆட்டத்தின் முடிவில் 2-0 என முன்னிலை பெற்றது அந்த அணி.
பின்னா் தொடங்கிய 2-ஆவது பாதியில், ஆட்டத்தின் 79-ஆவது நிமிடத்தில் பெங்களூரு அணிக்கு கிடைத்த பெனால்டி வாய்ப்பை அணி வீரா் சுனில் சேத்ரி அருமையான கோலாக மாற்றினாா். இதனால் பெங்களூரு அணி உத்வேகம் பெற்ற நிலையில், அதைக் கட்டுப்படுத்தும் விதமாக ஆட்டத்தின் 84-ஆவது நிமிடத்தில் மும்பை வீரா் பாா்த்தலோமியோ ஒக்பெசே ஒரு கோல் அடிக்க, 3-1 என முன்னேறிய மும்பை, இறுதியில் வெற்றியும் பெற்றது.