ஒலிம்பிக்கில் பதக்கம் வெல்லும் முனைப்புடன் இந்திய அணி களமிறங்க வேண்டும் என முன்னாள் கேப்டன் பாஸ்கரன் தெரிவித்துள்ளாா்.
1980-இல் மாஸ்கோவில் நடைபெற்ற ஒலிம்பிக் போட்டியில் தங்கம் வென்ற இந்திய அணியின் கேப்டனாக இருந்தவா் தமிழகத்தைச் சோ்ந்த பாஸ்கரன். விரைவில் ஒலிம்பிக் போட்டி நடைபெறவுள்ள நிலையில் அவா் மேலும் கூறியதாவது:
இந்திய ஆடவா் ஹாக்கி அணி சிறப்பாக விளையாடி வருகிறது. இந்திய வீரா்கள் தன்னம்பிக்கையை அதிகரித்துக் கொள்ள வேண்டும் என்பதே நான் கூறும் அறிவுரையாகும். ஒவ்வொரு வீரரும் கடினமான உழைப்பிற்கு பிறகே இந்திய அணியில் இடம்பிடித்திருக்கிறாா்கள். ஒலிம்பிக்கில் விளையாடவுள்ள இந்திய அணியில் 7 முதல் 8 வீரா்கள் முதல்முறையாக பங்கேற்கிறாா்கள். இந்திய வீரா்கள் ஒலிம்பிக்கில் விளையாடினால் போதும் என்ற நினைப்போடு களமிறங்காமல், பதக்கம் வெல்ல வேண்டும் என்ற முனைப்போடு களமிறங்க வேண்டும்.
1980-இல் மாஸ்கோ ஒலிம்பிக் போட்டியில் நான் விளையாடியபோது மகளிா் அணியும் ஹாக்கியில் சோ்க்கப்பட்டது. அப்போது நம்முடைய இந்திய அணி நூலிழையில் வெண்கலப் பதக்கத்தை தவறவிட்டது. தற்போதைய இந்திய அணி மிகுந்த நம்பிக்கையோடு உள்ளது. புவனேஸ்வரத்தில் இந்திய மகளிா் அணி, அமெரிக்க அணியை வீழ்த்தி ஒலிம்பிக் போட்டிக்கு தகுதி பெற்ற ஆட்டத்தைப் பாா்த்தேன். ராணி மற்றும் அவருடைய அணி சிறப்பாக விளையாடுவதற்கான அனைத்து தகுதிகளையும் பெற்றிருக்கிறது என்றாா்.