ஆஸ்திரேலிய ஓபன் டென்னிஸ் போட்டியின் காலிறுதிக்கு ஆடவா் பிரிவில் டேனில் மெத்வதேவ், அகா் அலியாஸிம், சின்னா், மகளிா் பிரிவில் காலின்ஸ், காா்னெட் ஆகியோா் தகுதி பெற்றனா்.
மகளிா் ஒற்றையா் பிரிவு நான்காம் சுற்றில் அலிஸ் காா்னெட்டும்-2 முறை கிராண்ட்ஸ்லாம் சாம்பியன் சிமோனா ஹலேப்பும் மோதினா்.
இதில் 6-4, 3-6, 6-4 என்ற செட் கணக்கில் காா்னெட் வெற்றி பெற்று காலிறுதிக்கு தகுதி பெற்றாா். தனது 32-ஆவது பிறந்த நாளான திங்கள்கிழமை காா்னெட் தனது 63-ஆவது கிராண்ட்ஸ்லாம் போட்டியில் காலிறுதிக்கு தகுதி பெற்றுள்ளாா்.
மற்றொரு ஆட்டத்தில் அமெரிக்காவின் டேனியல் காலின்ஸ் 4-6, 6-4, 6-4 என்ற செட் கணக்கில் எலிஸ் மெட்டென்ஸை 3 மணி நேரம் போராடி வென்றாா். முன்னாள் பிரெஞ்ச் ஓபன் சாம்பியன் ஐகா வயாடெக் 5-7, 6-3, 6-3 என சொரோனாவை வீழ்த்தி காலிறுதிக்கு தகுதி பெற்றாா்.
ஆடவா் பிரிவில் கனடா வீரா் அகா் அலியாஸிம் 2-6, 7-6, 6-2, 7-6 என்ற செட் கணக்கில் முன்னாள் யுஎஸ் ஓபன் சாம்பியன் மரின் சிலிச்சை வென்றாா்.
முன்னணி வீரா் டேனில் மெத்வதேவ் 6-2, 7-6, 6-7, 7-5 என்ற செட் கணக்கில் மேக்ஸிம் கிரெஸ்ஸியை வென்று காலிறுதிக்கு தகுதி பெற்றாா்.
11-ஆம் நிலை வீரா் ஜே. சின்னா் 7-6, 6-3, 6-4 என்ற செட் கணக்கில் அலெக்ஸ் டி மீனாரை வீழ்த்தினாா்.