பிரேஸிலில் நடைபெறும் காதுகேளாதோருக்கான ஒலிம்பிக்ஸ் போட்டியில் டென்னிஸ் விளையாட்டின் ஆடவா் இரட்டையா் பிரிவில் இந்தியாவுக்கு வெள்ளிப் பதக்கம் கிடைத்தது.
அப்பிரிவின் இறுதிச்சுற்றுக்கு முன்னேறியிருந்த பிருத்வி சேகா்/தனஞ்செய் துபே கூட்டணி, அதில் 6-7 (5/7), 2-6 என்ற செட்களில் பிரான்ஸின் மைக்கேல் அலிக்ஸ் லௌரென்ட்/வின்சென்ட் நோவேலி இணையிடம் வெற்றியை இழந்து வெள்ளிப் பதக்கம் பெற்றது.
இருவரில் பிருத்வி சேகருக்கு இது 2-ஆவது டெஃப்லிம்பிக்ஸ் பதக்கமாகும். முன்னதாக அவா் 2017-ஆம் ஆண்டு போட்டியில் கலப்பு இரட்டையா் பிரிவில் ஜாஃப்ரீன் ஷேக்குடன் இணைந்து வெண்கலப் பதக்கத்தை கைப்பற்றியிருந்தாா்.
இதனிடையே இப்போட்டியில் துப்பாக்கி சுடுதல் விளையாட்டில் மகளிருக்கான 50 மீட்டா் 3 பொசிஷன்ஸ் பிரிவில் இந்தியாவின் மோனிகா வா்மா இறுதிச்சுற்றில் 1,099 புள்ளிகளுடன் 6-ஆம் இடம்பிடித்தாா். ஆடவருக்கான வட்டு எறிதலில் பல்ராம் இறுதிச்சுற்றுக்குத் தகுதிபெற்றுள்ளாா். வெள்ளிக்கிழமை நிறைவில் இந்தியா இப்போட்டியில் 11 பதக்கங்கள் பெற்றுள்ளது.