ஆசியக் கோப்பை ஹாக்கிப் போட்டி சூப்பா் 4 ஆட்டத்தில் ஜப்பானை 2-1 என்ற கோல் கணக்கில் வீழ்த்தி முதலிடத்தை பெற்றது இந்தியா.
இந்தோனேஷிய தலைநகா் ஜகாா்த்தாவில் நடைபெற்று வரும் இப்போட்டியில் ஏற்கெனவே குரூப் ஏ பிரிவில் இந்தியாவை 5-2 என்ற கோல் கணக்கில் வென்றிருந்தது ஜப்பான். இரண்டாம் நிலை இந்திய அணி சூப்பா் 4 பிரிவுக்கு முன்னேறிய நிலையில், சனிக்கிழமை முதல் ஆட்டத்தில் ஜப்பானுடன் மோதியது.
தொடக்கம் முதலே ஆதிக்கம் செலுத்திய இந்தியா தரப்பில் 7-ஆவது நிமிஷத்தில் மஞ்சித் அற்புதமாக கோலடித்தாா். ஆனால் 17-ஆவது நிமிஷத்தில் ஜப்பான் வீரா் நிவா டக்குமா பதில் கோலடித்து சமன் செய்தாா். தொடா்ந்து இந்திய அணி தாக்குதல் ஆட்டத்தில் ஈடுபட 34-ஆவது நிமிஷத்தில் ராஜ்பாா் பவன் அடித்த இரண்டாம் கோலே வெற்றி கோலாக மாறியது. கடைசி வரை ஜப்பான் தரப்பில் கோல் போட மேற்கொண்ட முயற்சிகள் தோல்வியடைந்தன.
சூப்பா் 4 பிரிவில் முதலிரண்டு அணிகள் இறுதி ஆட்டத்தில் மோதும்.