தென்னாப்பிரிக்காவுக்கு எதிராகத் தோல்வியடைந்தது பற்றி இந்திய அணியின் தலைமைப் பயிற்சியாளர் ராகுல் டிராவிட் கருத்து தெரிவித்துள்ளார்.
டி20 உலகக் கோப்பைப் போட்டியில் முதல் இரு ஆட்டங்களில் வெற்றி பெற்ற இந்திய அணி ஞாயிறன்று நடைபெற்ற தென்னாப்பிரிக்காவுக்கு எதிரான ஆட்டத்தில் தோல்வியடைந்தது. வங்கதேசத்துக்கு எதிராக நாளை விளையாடுகிறது. தென்னாப்பிரிக்காவிடம் தோற்றது பற்றி இந்திய அணியின் தலைமைப் பயிற்சியாளர் ராகுல் டிராவிட் கூறியதாவது:
பெர்த் ஆட்டம் ஏமாற்றமாக அமைந்தது. நாங்கள் நன்றாகப் போராடினோம். கொஞ்சம் அதிர்ஷ்டம் இருந்திருந்தால்... நாங்கள் சில தவறுகளும் செய்தோம், கொஞ்சம் வேறு மாதிரியான முடிவுகள் அமைந்திருக்கும். பாகிஸ்தானுக்கு எதிரான ஆட்டமும் எந்தப் பக்கம் வேண்டுமானாலும் சென்றிருக்கலாம். டி20 கிரிக்கெட்டில் என்ன வேண்டுமானாலும் நடக்கும். நாங்கள் நம்பிக்கையுடன் உள்ளோம். நாங்கள் நன்கு விளையாடி இனிவரும் ஆட்டங்களில் ஜெயிக்க வேண்டும். (உலகக் கோப்பையை வெல்ல) அடுத்து நான்கு ஆட்டங்களை வெல்ல வேண்டும் என்றார்.