Enable Javscript for better performance
பலன் தரும் பசுந்தீவனச் சாகுபடி!- Dinamani

சுடச்சுட

    

    பலன் தரும் பசுந்தீவனச் சாகுபடி!

    Published on : 20th September 2012 05:26 AM  |   அ+அ அ-   |    |  

    agri1

    தருமபுரி: நமது நாட்டில் வேளாண்மை மற்றும் கால்நடைகள் இணைந்த கலப்புப் பண்ணை முறையே கையாளப்பட்டு வருகிறது. தரமான கால்நடை வளர்ப்புக்கும், அதிக வருமானம் பெறவும் பசுந்தீவனப் பயிர்களை சாகுபடி செய்வது அவசியம்.

     கால்நடைகளுக்கு புரதம், நார்ச்சத்து, உயிர் மற்றும் தாதுச் சத்துகளை அளிப்பதுடன் கால்நடைகளின் உடல் வெப்பநிலைக் கட்டுப்பாட்டிலும் பெரும் பங்கு வகிக்கிறது பசுந்தீவனம். சரியான இனப் பெருக்கத்துக்கும் இது இன்றியமையாதது.

     பசுந்தீவனத்தை பயிர் செய்வதன் மூலம் நிலத்தின் மண்வளம், மண்ணின் நீர் தாங்கும் திறன் அதிகரிக்கிறது. களைகள் மற்றும் தேவையற்ற புல், பூண்டுகளின் வளர்ச்சி தடுக்கப்படுகிறது. பயறு வகை பசுந்தீவனங்களை வளர்ப்பதால் மண்ணில் தழைச்சத்தின் வளம் கூடுகிறது.

     பசுந்தீவனப் பயிர்களை தேர்ந்தெடுக்கும் முன் முக்கிய அம்சங்களைக் கருத்தில் கொள்ள வேண்டும். பயிர் சாகுபடி முறை எளிதாக இருக்க வேண்டும். குறுகிய காலத்தில் அதிக விளைச்சல் தர வேண்டும். ஊட்டச்சத்து செறிவுள்ளதாகவும் இருக்க வேண்டும். காலநிலை மற்றும் மண் அமைப்பு பாதகமாக மாறினாலும், விளைச்சலில் பாதிப்பு இருக்கக் கூடாது. பூச்சி மற்றும் நோயால் பாதிக்கப்பட கூடாது.

     பசுந்தீவன வகைகள்: புல்வகைத் தீவனப் பயிர், தானிய வகைத் தீவனப் பயிர், பயறு வகைத் தீவனப் பயிர், மர வகைத் தீவனப் பயிர் ஆகியவை பசுந்தீவனங்களாகும்.

     புல் வகை: இந்தத் தீவனத்தில் புரதச்சத்து 1.5 சதம் முதல் 2 சதம், நார்ச்சத்து 6.25 சதம் முதல் 9 சதம் வரை இருக்கும். இறவைப் பயிராக நேப்பியர், கம்பு ஒட்டுப்புல் கோ-1, கோ-2, கோ-3 பயிரிடலாம். கினியாப் புல், பாரா புல், கொளுக்கட்டைப் புல் பயிரடலாம. மானாவரியாக கொளுக்கட்டை புல், தீனாநாத் புல் ஆகியவை பயிரிடலாம்.

     தானிய வகை: இறவையாக மக்காச் சோளம் பயிரிடலாம். மானாவரியாக தீவனச் சோளம், தீவனக் கம்பு பயிரிடலாம்.

     பயறு வகை: பசுந்தீவனத்தில் பயறு வகைகள் முக்கியமானதாகும். ஏனெனில், இந்த வகை தீவனத்தில் 3 சதம் முதல் 4 சதம் வரை புரதச் சத்தும், கால்சியமும் செறிந்துள்ளது. தானிய வகை பசுந்தீவனத்துடன், பயறு வகை தீவனத்தை 70:30 விகிதத்தில் கலந்து கொடுப்பது அவசியம். பயறு வகையால் வேர் மூலம் மண்ணில் நைட்ரஜன் நிலைப்படுத்தப்பட்டு தழைச்சத்து வளம் அதிகரிக்கிறது.

     பயறு வகைகளில் இறவையாக வேலி மசால், முயல் மசால், தீவனத் தட்டைப் பயறு, காராமணி, துவரை பயிரிடலம். மானாவரியாக முயல் மசால், சிராட்ரோ, டெஸ்மோடியம், சென்ட்ரோ, சங்கு புஷ்பம், கொள்ளு, துவரை பயிரிடலாம். குளிர்ப் பிரதேசங்களில் பெர்சீம், மொச்சை வகைகளைப் பயிரிடலாம்.

     கலப்பு பயிரிடுதல் முறை: பயறு வகை தீவனப் பயிர்களையும், தானிய வகைத் தீவனப் பயிர்களையும் கலப்புப் பயிராகக் கலந்து பயிரிடும்போது தனித்தனியே கிடைக்கும் மகசூலை விடவும் கூடுதலாக மகசூல் கிடைக்கும். கோ 1, 2, 3 ஆகியவற்றை 3 வரிசையாகவும், வேலி மசால் ஒரு வரிசையாகவும் கலந்து பயிரிடலாம். தீவனச் சோளம் 2 வரிசை, சோயா மொச்சை ஒரு வரிசையாகவும் பயிரிடலாம். கொளுக்கட்டை புல் 3 வரிசை, முயல் மசால் ஒரு வரிசையாகவும் பயிரிடலாம்.

     பசுந்தீவனச் சேமிப்பு: மழைக் காலத்தில் பசுந்தீவனப் பயிர்கள் உபரியாக இருக்கும். அவற்றை பதனப் பசுந்தீவனம், ஊறுகாய் புல், சைலேஜ் முறையில் சேமித்து வைக்கலாம்.

     சைலேஜ் தயாரிக்க உகந்த தீவனப் பயிர்களும், தக்க அறுவடைத் தருணமும்: வீரியப் புல் கோ 1, 2, 3 ஆகியவை பூக்கும் தருணத்தில் அறுவடை செய்ய வேண்டும். தானிய வகை சோளம், மக்காச் சோளம் ஆகியவற்றில் தானியங்கள் பால் பிடிக்கும் தருணத்தில் அறுவடை செய்யலாம். பயறு வகை குதிரை மசால் 25 முதல் 30 சதம் பயிர்கள் பூக்கும் தருணத்திலும், வேலி மசால், காராமணி தருணத்திலும் அறுவடை செய்யலாம்.

     பயறு வகைத் தீவனங்களைப் பதப்படுத்தினால் புரதச்சத்து சிதைந்து பலன் குன்றிவிடும். எனவே, அவற்றைப் பிற வகைத் தீவனப் பயிர்களுடன் 1:3 என்ற விகிதத்தில் கலந்து பதப்படுத்தலாம். சைலேஜ் தயாரிக்க பசுந்தீவனங்களைக் காற்றுப் புகாத இடத்தில் மூடி வைத்து சேமிக்க வேண்டும். இதற்குப் பயன்படும் அமைப்புகள் சைலோ எனப்படும்.

     உபரியாக கிடைக்கும் பசுந்தீவனத்தின் அளவு, கால்நடைகளின் எண்ணிக்கை, நிலப்பரப்பு, நில அமைப்பு ஆகியவற்றை அடிப்படையாகக் கொண்டு சைலோவின் அமைப்பும், எண்ணிக்கையும் தீர்மானிக்கப்படும்.

     சைலேஜ் தயார் செய்யும் முறை: பசுந்தீவனத்தை சுமார் 2 மணி நேரம் முதல் 3 மணி நேரம் சூரிய ஒளியில் உலர்த்தி ஈரப்பத அளவை 60 சத அளவில் குறைத்து, பயிரை 2 முதல் 3 அங்குலத் துண்டுகளாக நறுக்கி சைலோவில் இட்டு அடுக்கடுக்காக அடுக்கி வர வேண்டும். சுமார் ஓர் அடி உயரம் வந்த பின்னர், தீவனத்தை நன்கு அழுத்தி இடையே உள்ள காற்றை வெளியேற்ற வேண்டும்.

     பின்னர், அதன் மேல் 2 சதம் வெல்லப்பாகு அல்லது சர்க்கரை ஆலைக் கழிவுப் பாகு (மொலாசஸ்) மற்றும் ஒரு சதம் உப்புக் கரைசலைத் தெளிக்க வேண்டும். மீண்டும் பசுந்தீவனத்தை அடுக்க வேண்டும்.

     இதே முறையில் சைலோவை நிரப்பி காற்றுப் புகாதவாறு மூடிவிட வேண்டும். பின்னர், 2 முதல் 3 மாதங்களுக்குப் பிறகு இவற்றை கால்நடைகளுக்கு வழங்கலாம். பசுந்தீவன சாகுபடிக்கு குறிப்பிட்ட சில வகைகளுக்கு அரசு 100 சதம் மானியமும் வழங்குகிறது.

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    flipboard facebook twitter whatsapp