Enable Javscript for better performance
மருந்துக் கடை ஊழியர் கொலை வழக்கில் திருப்பம்: மனைவி கைது- Dinamani

சுடச்சுட

    

    மருந்துக் கடை ஊழியர் கொலை வழக்கில் திருப்பம்: மனைவி கைது

    By dn  |   Published on : 17th June 2013 04:51 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    கடலூர் மாவட்டம் பண்ருட்டி அருகே, சென்னையைச் சேர்ந்த மருந்துக்கடை ஊழியர் கொலை செய்யப்பட்ட வழக்கில், திடீர் திருப்பமாக, அவரது மனைவி ஞாயிற்றுக்கிழமை கைது செய்யப்பட்டார். கள்ளக்காதலுக்கு இடையூறாக இருந்ததால் கணவரை, தனது தூண்டுதலால் காதலன் தினேஷ்பாபு கொலை செய்ததாக போலீஸாரிடம் அவர் ஒப்புதல் வாக்குமூலம் அளித்துள்ளார்.

    கடலூர் மாவட்டம் பண்ருட்டி காந்தி சாலையைச் சேர்ந்தவர் சீனுவாசன் (30). சென்னை பட்டாளத்தில், மருந்துக்கடையில், ஊழியராக வேலை செய்து வந்தார். இவருக்கும் பண்ருட்டி தட்டாஞ்சாவடியைச் சேர்ந்த சந்திரசேகர் மகள் கல்பனாவுக்கும் கடந்த ஆண்டு திருமணம் நடந்தது.

    ஜூன் 1-ஆம் தேதி, முதலாம் ஆண்டு திருமண விழாவை பண்ருட்டியில் உள்ள தனது மாமியார் வீட்டில் கொண்டாடிய சீனுவாசன், மனைவி கல்பனாவுடன் பைக்கில் திருவதிகை அருகே சென்றபோது மர்ம நபர்களால் தாக்கி கொலை செய்யப்பட்டார்.

    சீனுவாசனை, நகைக்காக மர்மநபர்கள் கொலைசெய்ததாக, பண்ருட்டி அரசு மருத்துவமனையில் சிகிச்சையில் இருந்தபோது கல்பனா போலீஸாரிடம் புகார் கூறியிருந்தார்.

    இதுதொடர்பாக பண்ருட்டி காவல்துறை துணை கண்காணிப்பாளர் கிருஷ்ணசாமி வழக்குப்பதிவு செய்து விசாரணை நடத்தினார். இக்கொலை வழக்கில் குற்றவாளிகளைப் பிடிக்க விழுப்புரம் சரக டி.ஐ.ஜி. முருகன், மாவட்டக் காவல்துறை கண்காணிப்பாளர் ராதிகா உத்தரவில் மூன்று தனிப்படைகள் அமைக்கப்பட்டன.

    இதனிடையே, இக்கொலை தொடர்பாக, பண்ருட்டி மேலப்பாளையத்தைச் சேர்ந்த தினேஷ்பாபு (27), சென்னை எழும்பூர் நீதிமன்றத்தில் கடந்த 6-ஆம் தேதி சரணடைந்தார். புழல் சிறையில் அடைக்கப்பட்ட அவரை, பண்ருட்டி போலீஸார் காவலில் எடுத்து விசாரித்தனர். இதில், கல்பனாவுக்கும், தனக்கும் தொடர்பு இருந்ததும், கல்பனா தூண்டுதலின் பேரில் நண்பர் முரளியுடன் சேர்ந்து சீனுவாசனை கொலை செய்ததாகவும் தினேஷ்பாபு கூறியுள்ளார். இதையடுத்து கல்பனாவை போலீசார் கைது செய்து விசாரணை நடத்தினர்.

    போலீஸாரிடம் கல்பனா கொடுத்துள்ள வாக்குமூலத்தில் கூறியிருப்பதாவது: கல்லூரியில் படிக்கும் போது தினேஷ்பாபுவுடன் பழக்கம் ஏற்பட்டது. வேறு ஜாதி என்பதால் திருமணத்திற்கு பெற்றோர் மறுத்துவிட்டனர். தினேஷ்பாபுக்கு வேறு திருமணம் நடந்த பிறகும் எங்கள் பழக்கம் தொடர்ந்தது. இதனால் பெற்றோர், உறவுக்காரரான சீனுவாசனுக்கு என்னை திருமணம் செய்து வைத்தனர்.

    எங்கள் தொடர்பு தெரியவரவே, கணவர் என்னை கண்டித்தார். எனவே அவரை கொலை செய்ய முடிவெடுத்தேன். இதற்காக கடந்த 6 மாதமாக தினேஷ்பாபுவுடன் திட்டமிட்டேன். அதன்படி, திருமண நாளன்று தினேஷ்பாபு, அவரது நண்பருடன் சேர்ந்து சீனுவாசனை கொலை செய்தார். இதை மறைப்பதற்காக நகை, செல்போனை தினேஷ்பாபுவிடம் கொடுத்துவிட்டு கொள்ளையர்கள் வழிப்பறி செய்து கொலை செய்ததாக நாடகமாடினோம் எனக் கூறியுள்ளார்.

    இதனைத் தொடர்ந்து தினேஷ்பாபு வீட்டில் மறைத்து வைக்கப்பட்டிருந்த ரத்தக்கறை படிந்த துணி, கத்தி, கல்பனா கொடுத்த நகை மற்றும் பைக் ஆகியவற்றை போலீஸார் பறிமுதல் செய்தனர். இவ்வழக்கில் தொடர்புடைய முரளியை பண்ருட்டி போலீஸார் கைது செய்து விசாரணை நடத்தி வருகின்றனர்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai