சுடச்சுட

    
    kali

    தஞ்சாவூர் மாவட்டம், பேராவூரணி வட்டம், முதுகாடு என்ற ஊரில் கி.பி. 12 - 13 ஆம் நூற்றாண்டைச் சேர்ந்த காடுகிழாள் சிற்பம் கண்டெடுக்கப்பட்டுள்ளது.

    இந்தச் சிற்பம் தொடர்பாக முதுகாட்டைச் சேர்ந்த குழ. செல்லையா, மங்கள நாட்டைச் சேர்ந்த அருணாசலம் ஆகியோர் துணையுடன், வரலாற்று ஆய்வாளர் முனைவர் குடவாயில் பாலசுப்பிரமணியன் ஆய்வு செய்தார்.

    இதுகுறித்து அவர் தெரிவித்திருப்பது:

    தமிழ்நாட்டில் கொற்றவை என்ற தேவியின் வழிபாடு சங்கக் காலத்திலிருந்து தொடருகிறது. தமிழின் இலக்கண நூலான தொல்காப்பியம், பெரும்பாணாற்றுப்படை, சிலப்பதிகாரம் போன்ற பழைய நூல்களில் கொற்றவை பற்றி விவரிக்கப்பட்டுள்ளது.

    அக்கொற்றவையின் ஒரு வடிவமே காடுகிழாள் என்பதாகும். பொதுவாக வனங்களின் (காடுகளின்) தெய்வமாகவும், போரில் வெற்றி தரும் தெய்வமாகவும் காடுகிழாள் வணங்கப் பெற்றாள்.

    கி.பி. 8 ஆம் நூற்றாண்டில் சோழ நாட்டுக் கோடியக்கரைக்கு வந்த சுந்தரர், அக்காட்டில் சிவலிங்க உருவம் காடுகிழாள் உருவத்தின் துணையோடு மட்டும் திகழ்ந்ததாக அவருடைய தேவாரத்தில் குறிப்பிட்டுள்ளார்.

    முதுகாடு என்ற இத்தொன்மையான ஊர் சோழர் காலத்தில் சோழ நாட்டுக்கும், பாண்டிய நாட்டுக்கும் எல்லையாகத் திகழ்ந்தது. மேலும், வெள்ளாற்றின் வடகரையிலும், அம்புலியாற்றுக்குத் தென்கரையிலும் திகழ்ந்த வடகரை வெள்ளாற்று நாட்டில் திகழ்ந்த ஊர் இது. சோழ நாட்டின் காடு அரணாகத் திகழ்ந்த முதுகாட்டின் காவல் தெய்வமே இந்த காடுகிழாள் சிற்பம்.

    எட்டு கரங்களோடு வீராசனத்தில் அமர்ந்துள்ள இத்தேவியின் வடிவம் நிசும்பன் என்ற அரக்கனை தன் காலால் மிதித்த வண்ணம் காணப்படுகிறது.

    அவள் கரங்களில் முறையே கபாலம், வாள், கேடயம், திரிசூலம், உடுக்கை, வில், கைமணி ஆகியவை திகழ ஒரு கரம் உயர்ந்து விஸ்மயம் என்ற வியப்பு முத்திரையைக் காட்டுகிறது.

    அக்காலத்தில் எவ்வாறு கோயில் இல்லாமல் காட்டின் நடுவே காடுகிழாள் காட்சி தருவாளோ, அதுபோன்றே இன்றும் முதுகாட்டில் இச்சிற்பம் காணப்படுவது குறிப்பிடத்தக்கது என குடவாயில் பாலசுப்பிரமணியன் தெரிவித்துள்ளார்.

    Thirumana Porutham
    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai