Enable Javscript for better performance
பாஜக கூட்டணி வெற்றிக்கூட்டணி: விஜயகாந்த் - Dinamani

சுடச்சுட

    
    vijayakanth

    பாஜக கூட்டணி மக்கள் கூட்டணி, வெற்றிக் கூட்டணி என தேமுதிக தலைவர் விஜயகாந்த் பேசினார்.

    சிவகங்கை மக்களவைத் தொகுதியில் பா.ஜ.க. சார்பில் போட்டியிடும் வேட்பாளர் ஹெச்.ராஜாவை ஆதரித்து ஞாயிற்றுக்கிழமை சிவகங்கை நகர் பகுதியில் நடைபெற்ற பிரசார கூட்டத்தில் விஜயகாந்த் பேசியதாவது:

    பாஜக கூட்டணி மக்கள் கூட்டணி, வெற்றிக் கூட்டணி. மோடி பிரதமராவதற்கு வேட்பாளர் ராஜாவுக்கு வாக்களிக்க வேண்டும். இந்தத் தொகுதியின் உறுப்பினராக உள்ள மத்திய நிதி அமைச்சர் ப.சிதம்பரம் எதுவும் செய்யவில்லை. சிவகங்கை தொகுதியை குட்டி சிங்கப்பூராக ஆக்குவேன் என சொன்னார். ஆனால், தொகுதி வளர்ச்சி பெறவில்லை. வங்கிகளையும், ஏடிஎம்களையும் திறந்த போதிலும் அதில் பணத்தை செலுத்த ஏழைகளிடம் வசதி இல்லை. தோல்வி பயம் காரணமாகவே இத்தொகுதியில் சிதம்பரம் போட்டியிடவில்லை.

    சிவகங்கை நகரில் சாலைகள் படுமோசமாக உள்ளன. இரவு 9 மணிக்கு மேல் வெளியூர்களுக்கு செல்லவும், வெளியூரிலிருந்து சிவகங்கைக்கு வரவும் போதிய பஸ் வசதி இல்லை. சட்டம் ஒழுங்கும் இப்பகுதியில் மோசமாகத் தான் உள்ளது. காங்கிரஸýம், அதிமுகவும் ஒருவரை ஒருவர் குற்றம் சொல்லி வருகின்றனர். இந்த இரண்டு கட்சிகளையும் தேர்தல் மூலம் வீட்டுக்கு அனுப்பாமல் ஓயப்போவதில்லை. மக்களவைத் தேர்தலில் அமைதி, வளம், வளர்ச்சி என அதிமுக கூறி வருவதில் வளம், வளர்ச்சி என்பது அக்கட்சியைச் சேர்ந்த அமைச்சர்களுக்கு மட்டும் பொருந்துவதாக உள்ளது என்றார் விஜயகாந்த்.

    ஊழலற்ற ஆட்சி அமைக்க ஆதரியுங்கள்: இதைத் தொடர்ந்து திருச்சியில் விஜயகாந்த் பிரசாரம் செய்தார்.

    திருச்சி காஜாபேட்டை அரசமரத்தடியில் தேமுதிக வேட்பாளர் ஏஎம்ஜி. விஜயகுமாரை ஆதரித்து ஞாயிற்றுக்கிழமை அவர் பேசியது:

    திருச்சியில் பெல் நிறுவனம் தொடங்கப்பட்ட பிறகு, நூற்றுக்கணக்கான துணை நிறுவனங்கள் தொடங்கப்பட்டன. அந்த நிறுவனங்கள் இப்போது முழுமையாகச் செயல்படவில்லை. காரணம் மின்வெட்டு.

    திருச்சி நகர் முழுவதும் போக்குவரத்து நெரிசலில் சிக்கியிருக்கிறது. நான்கு சாலைப் பகுதியில் பஸ் நிலையத்தை மாற்றினால் போக்குவரத்து நெரிசல் குறையும்.

    ஏற்கெனவே எம்பியாக இருந்தவரே இப்போது மீண்டும் அதிமுகவில் போட்டியிடுகிறார். வாசனை திரவியத் தொழிற்சாலை அமைக்கப்படும் என அவர் வாக்குறுதி அளித்தாரே? எங்கே வந்திருக்கிறது என வாக்காளர்கள் கேட்க வேண்டும்.

    மக்களுக்கு தண்ணீர் கொடுக்கவும், மின்சாரம் கொடுக்கவும், வேலை கொடுக்கவும் கேட்கத்தான் நான் வந்திருக்கிறேன்.

    மீத்தேன் வாயு எடுக்கும் பணிக்கு கையெழுத்திட்ட திமுக இப்போது நாடகம் ஆடுகிறார்கள். 3 ஆண்டு ஆட்சியில் தமிழ்நாட்டைக் கெடுத்துவிட்டார்கள்.

    ஊழல் காரணமாக விலைவாசி உயர்ந்திருக்கிறது.

    திமுக முன்னாள் அமைச்சர் நேருவின் தம்பி ராமஜெயம் நல்லவரா? கெட்டவரா? என எனக்குத் தெரியாது. ஆனால், அவர் கொல்லப்பட்டு 3 ஆண்டுகளாகிறது. தமிழ்நாட்டு போலீஸ் ஸ்காட்லாந்து போலீஸýக்கு இணையான போலீஸ் என்கிறார்கள். இன்னமும் குற்றவாளிகளைக் கண்டுபிடிக்கவில்லையே ஏன் என்று அவர் கேள்வி எழுப்பினார்.

    • அதிகம்
      படிக்கப்பட்டவை
    • அதிகம் இ-மெயில் செய்யப்பட்டவை
    google_play app_store
    kattana sevai