பிரபல கியூ.எஸ். நிறுவனம் வெளியிட்டுள்ள உலக பல்கலைக்கழகங்களின் தரவரிசைப் பட்டியலில் முதல் 200 இடங்களில் 3 இந்திய கல்வி நிறுவனங்கள் இடம்பிடித்துள்ளன. சென்னை அண்ணா பல்கலைக்கழகமும் இந்தப் பட்டியலில் இடம்பிடித்து அசத்தியுள்ளது.
ஆராய்ச்சிக் கட்டுரைகள் வெளியீடு, புதிய கண்டுபிடிப்புகளுக்கான அறிவுசார் சொத்துரிமை, ஆராய்ச்சி ஊக்குவிப்பு என்பன உள்ளிட்ட பல்வேறு காரணிகளின் அடிப்படையில் உலகம் முழுவதும் உள்ள பல்கலைக்கழகங்களை ஆய்வு செய்து, தரவரிசைப் பட்டியலை கியூ.எஸ். நிறுவனம் ஒவ்வொரு ஆண்டும் வெளியிட்டு வருகிறது.
அந்த வகையில் 2018 -ஆம் ஆண்டுக்கான உலக பல்கலைக்கழக தரவரிசைப் பட்டியலை இப்போது வெளியிட்டிருக்கிறது. இதில் கடந்த ஆண்டைப் போலவே அமெரிக்காவைச் சேர்ந்த எம்.ஐ.டி. (மசாசூசெட்ஸ் தொழில்நுட்ப கல்வி நிறுவனம்) முதலிடத்தையும், ஸ்டான்ஃபோர்ட் பல்கலைக்கழகம் இரண்டாம் இடத்தையும், ஹார்வார்ட் பல்கல்கலைக்கழகம் மூன்றாம் இடத்தையும் பிடித்துள்ளன.
ஐ.ஐ.எஸ்சி.க்கு பின்னடைவு: தில்லி ஐஐடி 172 -ஆவது ரேங்க் பெற்று இந்திய கல்வி நிறுவனங்களில் முதல் நிறுவனம் என்ற பெருமையை பெற்றுள்ளது. இதற்கு அடுத்தபடியாக 179 -ஆவது இடத்தில் மும்பை ஐஐடி உள்ளது.
கடந்த முறை 152 ஆவது இடத்திலிருந்த பெங்களூரு ஐஐஎஸ்சி (இந்திய அறிவியல் கழகம்) கல்வி நிறுவனம், 190 -ஆவது ரேங்க் பெற்று பின்னடைவைச் சந்தித்துள்ளது.
சென்னை ஐஐடி-க்கும் பின்னடைவு: அதேபோல், கடந்த முறை 249 -ஆவது ரேங்க் பெற்றிருந்த சென்னை ஐஐடி இம்முறை 264 -ஆவது ரேங்குக்கு தள்ளப்பட்டுள்ளது.
அண்ணா பல்கலை அசத்தல்: இந்த உலகத் தரவரிசைப் பட்டியலில் சென்னை அண்ணா பல்கலைக்கழகம் முதல் முறையாக இடம்பிடித்து அசத்தியுள்ளது. அண்ணா பல்கலைக்கழகம் 651 முதல் 700 வரையிலான ரேங்க் பட்டியலில் இடம்பெற்றுள்ளது.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.