Enable Javscript for better performance
சட்டவிரோத பணப் பரிமாற்றம்: கனிஷ்க் மீது அமலாக்கத் துறை வழக்கு- Dinamani

சுடச்சுட

    

    சட்டவிரோத பணப் பரிமாற்றம்: கனிஷ்க் மீது அமலாக்கத் துறை வழக்கு

    By  சென்னை,  |   Published on : 24th March 2018 01:03 AM  |   அ+அ அ-   |   எங்களது தினமணி யுடியூப் சேனலில், சமீபத்திய செய்தி மற்றும் நிகழ்வுகளின் வீடியோக்களைப் பார்க்க, சப்ஸ்கிரைப் செய்ய இங்கே கிளிக் செய்யுங்கள்!

    சட்டவிரோத பணப் பரிமாற்றத்தில் ஈடுபட்டதாக கனிஷ்க் நிறுவனத்தின் மீது அமலாக்கத் துறையினர் வழக்குப் பதிவு செய்தனர்.
     சென்னை, நுங்கம்பாக்கம் கோத்தாரி சாலையைச் சேர்ந்தவர் பூபேஷ் குமார் ஜெயின். இவர் மனைவி நீட்டா ஜெயின். இவர்கள் சென்னை தியாகராயநகர் வடக்கு உஸ்மான் சாலையில் "கனிஷ்க்' என்ற பெயரில் தங்கம், வைரம், வைடூரியம், பிளாட்டினம் போன்றவற்றின் நகைகளை தயாரித்து, விற்பனை செய்யும் நிறுவனம் நடத்தி வருகின்றனர்.
     இந்த நிறுவனம், நகை இருப்பை அதிகம் காட்டியும், போலியான ஆண்டு நிதி அறிக்கை தயாரித்து அதிக லாபம் காட்டியும் தேசிய உடமையாக்கப்பட்ட வங்கிகள், தனியார் வங்கிகள் என மொத்தம் 14 வங்கிகளில் ரூ.824.15 கோடி மோசடியாக கடன் பெற்றனர்.
     இந்த கடனுக்காக செலுத்தப்பட வேண்டிய வட்டித் தொகையையும், நிலுவைத் தொகையையும் கடந்த ஆண்டு ஏப்ரல் மாதம் முதல் செலுத்தவில்லை. இதை அண்மையில் கண்டறிந்த பாரத ஸ்டேட் வங்கி நிர்வாகம், பெங்களூருவில் உள்ள சிபிஐ வங்கி பாதுகாப்பு மற்றும் மோசடி தடுப்புப் பிரிவில் புகார் செய்தது. அந்த புகாரின் அடிப்படையில் பூபேஷ்குமார், நீட்டா ஜெயின் உள்பட 6 பேர் மீது சிபிஐ அதிகாரிகள் வழக்குப் பதிவு செய்தனர்.
     இந்த வழக்குத் தொடர்பாக பூபேஷ்குமார் ஜெயின் வீடு, அலுவலகம், தொழிலகம் உள்ளிட்ட பல்வேறு இடங்களில் சோதனை நடத்தி, முக்கிய ஆவணங்களை சிபிஐ அதிகாரிகள் பறிமுதல் செய்தனர். மேலும் இது தொடர்பாக பூபேஷ்குமார், அவர் மனைவி நீட்டா ஜெயின் ஆகியோரிடம் பெங்களூருவில் வைத்து பல கட்டங்களாக சிபிஐ அதிகாரிகள் விசாரணை மேற்கொண்டுள்ளனர்.
     அமலாக்கத் துறை வழக்கு: இந்நிலையில், இந்த மோசடி குறித்து அமலாக்கத் துறையும் விசாரணை மேற்கொண்டது.
     இந்த மோசடியில் கனிஷ்க் நிறுவனம் சட்டவிரோத பணப் பரிமாற்றத்தில் ஈடுபட்டிருப்பது விசாரணையில் தெரியவந்தது. இதையடுத்து அமலாக்கத் துறை அதிகாரிகள், கனிஷ்க் நிறுவனம், அதன் இயக்குநர்கள் பூபேஷ்குமார் ஜெயின், அவரது மனைவி நீட்டா ஜெயின், பங்குத்தாரர்கள் உள்பட 6 பேர் மீது வெள்ளிக்கிழமை வழக்குப் பதிவு செய்தனர்.
     சொத்துக்களை முடக்க நடவடிக்கை: இந்த வழக்குத் தொடர்பாக அமலாக்கத் துறை அதிகாரிகள், விரைவில் பூபேஷ்குமார் ஜெயின், நீட்டா ஜெயின் ஆகியோரிடம் விசாரணை நடத்த திட்டமிட்டுள்ளனர். பூபேஷ்குமார் ஜெயின் சட்டவிரோத பணப் பரிமாற்றத்தின் மூலம் சம்பாதித்த சொத்துக்களை முடக்குவதற்குரிய நடவடிக்கைகளிலும் அமலாக்கத் துறை அதிகாரிகள் ஈடுபட்டுள்ளனர்.
     மத்தியக் குற்றப் பிரிவு விசாரணை: சென்னையை சேர்ந்த புகழேந்தி என்பவர், அண்மையில் சென்னை பெருநகர காவல்துறை அலுவலகத்தில் ஒரு புகார் அளித்தார்.
     அந்த புகாரில், பூந்தமல்லி அருகே தனக்கு சொந்தமான பல கோடி ரூபாய் மதிப்புள்ள 10 ஏக்கர் நிலத்தை வாங்குவதாக பூபேஷ்குமார் ஜெயின் ஒப்பந்தம் செய்துவிட்டு, அந்த ஆவணங்களை வைத்து வங்கியில் ரூ. 42 கோடி கடன் பெற்று மோசடி செய்துவிட்டதாகவும், அவர் மீது நடவடிக்கை எடுக்கக் கோரியும் குறிப்பிட்டிருந்தார்.
     இந்த புகாரின் அடிப்படையில் மத்தியக் குற்றப் பிரிவு போலீஸார் விசாரணை நடத்தி வருகின்றனர்.
     இப் புகாரின் அடிப்படையில் பூபேஷ்குமார் மீது போலீஸார் வழக்குப் பதிவதற்கு வாய்ப்பு இருப்பதாக கூறப்படுகிறது.
     
     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai