தமிழகத்தில் காலியாகவுள்ள நான்கு சட்டப்பேரவைத் தொகுதிகளுக்கு நடைபெறவுள்ள இடைத்தேர்தலில் போட்டியிடுவதற்கான வேட்புமனு தாக்கல், திங்கள்கிழமை (ஏப். 22) தொடங்குகிறது. வாக்குப்பதிவு மே 19-இல் நடைபெறுகிறது.
தமிழகத்தில் காலியாக உள்ள 22 சட்டப்பேரவைத் தொகுதிகளில் 18 தொகுதிகளுக்கான இடைத்தேர்தல் கடந்த 18-ஆம் தேதி நடைபெற்றது.
மேலும் காலியாகவுள்ள சூலூர், அரவக்குறிச்சி, திருப்பரங்குன்றம், ஓட்டப்பிடாரம் ஆகிய 4 சட்டப்பேரவைத் தொகுதிகளுக்கான இடைத்தேர்தல் அடுத்த மாதம் 19-ஆம் தேதி நடைபெறவுள்ளது.
இந்நிலையில், அந்தத் தொகுதிகளுக்கான வேட்புமனு தாக்கல், திங்கள்கிழமை (ஏப். 22) தொடங்குகிறது. வேட்புமனு தாக்கல் செய்ய ஏப். 29-ஆம் தேதி கடைசி நாளாகும். ஏப். 30-ஆம் தேதி வேட்புமனுக்கள் பரிசீலிக்கப்படும். வேட்புமனுக்களைத் திரும்பப் பெற மே 2-ஆம் தேதி கடைசி நாளாகும்.
வாக்குப் பதிவு மே 19-ஆம் தேதி, வாக்கு எண்ணிக்கை மே 23-ஆம் தேதி நடைபெறவுள்ளது. தேர்தலுக்கான அனைத்து நடைமுறைகளும் மே 27-இல் நிறைவடையும் என்று தேர்தல் ஆணையம் அறிவித்துள்ளது.
தேர்தல் நடத்தை விதிகள்: நான்கு சட்டப் பேரவைத் தொகுதிகளுக்கு இடைத்தேர்தல் நடைபெற்றாலும், அந்தத் தொகுதிகள் அமைந்துள்ள கோவை, மதுரை, கரூர், தூத்துக்குடி ஆகிய மாவட்டங்கள் முழுமைக்கும் தேர்தல் நடத்தை நெறிமுறைகள் அமலில் இருக்கும் என்று தலைமைத் தேர்தல் அதிகாரி சத்யபிரத சாகு சனிக்கிழமை தெரிவித்தார்.