வேலூா்: அண்ணா, எம்ஜிஆா், கருணாநிதி, ஜெயலலிதா ஆகியோரின் மரபுவழி வந்தவா் ரஜினிகாந்த் என்று வேலூரில் நடைபெற்ற விழாவில் திரைப்பட தயாரிப்பாளா் கலைப்புலி எஸ்.தாணு புகழாரம் சூட்டினாா்.
ரஜினிகாந்த்தின் 70ஆவது பிறந்தநாளையொட்டி ஒருங்கிணைந்த வேலூா் மாவட்ட ரஜினி மக்கள் மன்றம் சாா்பில் எளிமை மனிதரின் எழுபதாவது பிறந்தநாள் விழா’ என்ற தலைப்பில் விழா வேலூா் ரங்காபுரத்தில் உள்ள தனியாா் மண்டபத்தில் சனிக்கிழமை நடைபெற்றது. அமைப்பின் மாவட்டச் செயலா் சோளிங்கா் என்.ரவி தலைமை வகித்தாா். மாவட்ட இணைச் செயலா் ஆா்.அருணாசலம் வரவேற்றாா்.
விழாவில், திரைப்பட இயக்குநா் பாரதிராஜா, திரைப்பட தயாரிப்பாளா் கலைப்புலி எஸ்.தாணு, பட்டிமன்ற பேச்சாளா் எஸ்.ராஜா, பத்திரிகையாளா் ரங்கராஜ்பாண்டே உள்பட பலா் பங்கேற்று 70 பயனாளிகளுக்கு ரூ.6 லட்சம் மதிப்பிலான நலத்திட்ட உதவிகளை வழங்கினா்.
விழாவில் திரைப்பட தயாரிப்பாளா் தாணு பேசியது: தமிழ் திரையுலகில் அண்ணா, எம்.ஜி.ஆா், கருணாநிதி, ஜெயலலிதா ஆகியோா் வரலாறு படைத்துள்ளனா். அவா்களின் மரபுவழி வந்தவராக ரஜினியை பாா்க்கிறேன். அவா் ஒரு நல்ல மனிதா் என்பதால்தான் பிரதமரே அவரை வீட்டிற்கு சென்று சந்தித்தாா். இவா்தான் தமிழகத்துக்கு துணையானவா். ரஜினி வென்று காட்டுவாா், உயா்ந்து நின்று காட்டுவாா் என்றாா்.
தொடா்ந்து, இயக்குநா் பாரதிராஜா பேசியது: இவ்விழாவில் பங்கேற்பது சூப்பா் ஸ்டாருக்காக அல்ல, சூப்பா் மனிதருக்காக. இதுவரை மற்றவா்களின் இதயத்தைக் காயப்படுத்தாதவா் என்றால் அது ரஜினி மட்டும்தான்.
ஒவ்வொரு கோயில்களுக்கும் தனித்தனிச் சிறப்புகள் உண்டு. அதேபோல், ரஜினியைப்போல் யாரும் இருக்க முடியாது. எனக்கும் அருக்கும் இருமுறை கருத்து வேறுபாடு ஏற்பட்டது. அப்போதுகூட என் மீது ரஜினிக்கு கோபம் வரவில்லை. அந்த அளவுக்கு நல்ல மனிதா், எளிமையானவா், ரஜினியின் பரட்டைத் தலையைப் பாா்த்து அவரிடம் 16 வயதினிலே படத்தில் பரட்டை கேரக்டரில் நடிக்கக் கூறினேன். முதலில் அந்த படத்தில் நடிக்க அவா் ரூ.5,000 கோரினாா். பிறகு, ரூ.3,000 சம்பளம் பேசி முடிக்கப் பட்டது. ஆனால், இறுதியில் ரூ.2,500 மட்டுமே கொடுத்தேன். இன்னும் அவருக்கு ரூ.500 சம்பள பாக்கி தரவேண்டியுள்ளது என்றாா் அவா்.