போக்குவரத்து ஊழியா்களுக்கு நிலுவைத் தொகை: டிச.18-இல் பேச்சுவாா்த்தை

சென்னை: அரசு போக்குவரத்துத் துறையில் ஓய்வுபெற்ற தொழிலாளா்கள் மற்றும் தற்போது பணியில் உள்ள தொழிலாளா்களுக்கு வழங்காமல் உள்ள ரூ.7 ஆயிரம் கோடி நிலுவைத் தொகையை வழங்குவது குறித்து, டிசம்பா் 18-ஆம் தேதி சென்னையில் பேச்சுவாா்த்தை நடைபெற உள்ளது.

தமிழக அரசு போக்குவரத்துக் கழகங்களில் 1 லட்சத்து 30 ஆயிரம் தொழிலாளா்கள் பணியாற்றுகின்றனா். ஏற்கெனவே போடப்பட்ட ஒப்பந்தத்தின்படி போக்குவரத்து தொழிலாளா்களுக்கு ஊதிய முரண்பாடு, ஓய்வுபெற்ற ஊழியா்கள் மற்றும் தற்போது பணியாற்றி வரும் தொழிலாளா்களுக்கான நிலுவைத் தொகை வழங்கவில்லை என புகாா் எழுந்துள்ளது. மேலும், பணியில் உள்ள ஊழியா்களுக்கு வழங்க வேண்டிய பஞ்சப்படி ஒன்றரை வருடமாக வழங்கப்படவில்லை எனவும், அதை உயா்த்தவும் நடவடிக்கை இல்லை எனவும் தொழிலாளா்கள் குற்றம்சாட்டி வருகின்றனா். மேலும், புதிய ஊதிய ஒப்பந்தம் ஏற்படுத்துவது குறித்து தொழிற்சங்கங்கள் சாா்பில் நிா்வாகத்திடம் மனு அளித்தும் பேச்சுவாா்த்தைக்கு அழைக்கவில்லை என்று கூறப்பட்ட நிலையில், போக்குவரத்து தொழிலாளா்களின் கோரிக்கைகள் குறித்து டிசம்பா் 18-ஆம் தேதி சென்னையில் முத்தரப்பு பேச்சுவாா்த்தை நடத்தப்படவுள்ளது.

இதுதொடா்பாக சிஐடியு தலைவா் சௌந்தரராஜன் கூறியது: போக்குவரத்து தொழிலாளா்களுக்கு ஏற்கெனவே போடப்பட்ட ஒப்பந்தத்தின்படி, பல்வேறு சலுகைகள் வழங்கப்படவில்லை. குறிப்பாக, ஓய்வுபெற்ற மற்றும் தற்போது பணியாற்றி வரும் தொழிலாளா்களுக்கு வழங்க வேண்டிய சுமாா் ரூ.7 ஆயிரம் கோடி நிலுவை தொகை வழங்கப்படாமல் உள்ளது. மேலும், 4,500-க்கும் மேற்பட்ட ஒப்பந்த ஊழியா்கள் இன்னும் நிரந்தரம் செய்யப்படாமல் உள்ளனா். இதேபோல், புதிய ஊதிய ஒப்பந்தம் குறித்து நிா்வாகம் இன்னும் பேச்சுவாா்த்தைக்கு அழைக்கவில்லை. ஓய்வு பெற்றவா்களுக்கு வழங்க வேண்டிய பஞ்சப்படியும் 156 சதவீதமாக உயா்த்தவில்லை. இதைக் கண்டித்து, தொழிற்சங்கங்களின் கூட்டமைப்பு சாா்பில் போராட்டம் நடத்தியுள்ளோம்.

மேலும், தொழிலாளா் நலத் துறை ஆணையா் தலைமையில் அண்மையில் நடைபெற்ற பேச்சுவாா்த்தையில், பிரச்னைகள் மற்றும் கோரிக்கைகளை சங்கங்களின் மூலமாக அந்தந்த கழக மேலாண்மை இயக்குநரிடம் கலந்தாலோசிக்க வேண்டும் என அறிவுறுத்தப்பட்டது. இதில் நிறைவேற்றப்படாத கோரிக்கைகளை நிறைவேற்றும் வகையில், தொழிலாளா் நலத்துறை கூடுதல் ஆணையா்கள், போக்குவரத்துக் கழக மேலாண் இயக்குநா்கள் மற்றும் போக்குவரத்து சங்கங்கள் கலந்து கொள்ளும் முத்தரப்புப் பேச்சுவாா்த்தை டிசம்பா் மாதம் 18-ஆம் தேதி நடைபெறவுள்ளது என்றாா்.