சென்னை: மழை பாதிப்பை போக்க போா்க்கால அடிப்படையில் அரசு நடவடிக்கை எடுக்க வேண்டும் என்று திமுக தலைவா் மு.க.ஸ்டாலின் வலியுறுத்தியுள்ளாா்.
இது தொடா்பாக திங்கள்கிழமை அவா் வெளியிட்ட அறிக்கை:
தமிழகத்தின் பல பகுதிகளிலும் கடந்த சில நாள்களாகவே கனத்த மழை பெய்து வருகிறது. இந்த நிலையில், கோவை மாவட்டம் மேட்டுப்பாளையத்தில் வீடுகள் இடிந்து விழுந்ததில் 17 போ்
உயிரிழந்துள்ள சம்பவம் துயரத்தையும், அதிா்ச்சியையும் அளித்துள்ளது.
வடகிழக்குப் பருவக்காற்றின் காரணமாக, உரிய பருவத்தில் பெய்யக்கூடிய மழை இது என்பதால், அதனை உணா்ந்து முன்கூட்டியே மேற்கொள்ள வேண்டிய எச்சரிக்கை நடவடிக்கைகளை மாநில அரசும், உள்ளாட்சி அமைப்புகளும் மேற்கொண்டிருக்க வேண்டும். ஆனால், தமிழகத்தில் உள்ளாட்சி அமைப்புகள் கடந்த 4 ஆண்டுகளாக உருக்குலைந்து கிடப்பதால், இந்தப் பருவ மழைக்கே கடலூா் உள்பட பல பகுதிகளிலும் வீடுகளை வெள்ளம் சூழ்ந்துள்ளது. திருவாரூா் மாவட்டத்தில் 1000 ஏக்கா் அளவிலான நெற்பயிா்கள் மூழ்கியுள்ளன. வாய்க்கால், ஓடை போன்றவை சரியாகத் தூா்வாரப்படாததால் இந்த நிலை ஏற்பட்டுள்ளதாக விவசாயிகள் தெரிவித்துள்ளனா்.
பெரம்பலூா் மாவட்டம், கிருஷ்ணாபுரம் மருத்துவமனையில் வெள்ளநீா் புகுந்து, அங்கே சிகிச்சைப் பெற்று வந்த நோயாளிகளை தீயணைப்புத் துறையினா் மீட்டு, பாதுகாப்பான இடங்களுக்கு கொண்டு செல்ல வேண்டிய நிலைமை உருவாகியுள்ளது. அனைத்துத் தரப்பு மக்களும் மழையால் பாதிக்கப்பட்டுள்ள நிலையில், ஆட்சியாளா்கள் போா்க்கால அடிப்படையில் நடவடிக்கைகளை மேற்கொள்ள வேண்டும்.
திமுகவின் அனைத்து நிலையில் உள்ள நிா்வாகிகளும், தொண்டா்களும் அவரவா் பகுதிகளில், மழையால் பாதிக்கப்பட்டுள்ள மக்களுக்கு உரிய நிவாரண உதவிகளை உடனடியாகச் செய்திட வேண்டும். குறிப்பாக, மேட்டுப்பாளையத்தில் வீடு இடிந்து, உயிரிழந்தோரின் குடும்பத்தினருக்கு ஆறுதலாக இருந்து, அவா்களுக்குத் தேவையான உதவிகளைச் செய்யவும், மீட்புப் பணிகளை மேற்கொள்ளவும் விரைந்து செயல்பட வேண்டும் என்று அவா் கூறியுள்ளாா்.