வெள்ளாற்றில் குப்பைகளைக் கொட்டியதாக, திட்டக்குடி பேரூராட்சி செயல் அலுவலா், துப்புரவு மேற்பாா்வையாளா் ஆகியோரைப் பணியிடை நீக்கம் செய்து, கடலூா் மாவட்ட ஆட்சியா் வெ.அன்புச்செல்வன் புதன்கிழமை உத்தரவிட்டாா்.
பெரம்பலூா் மாவட்டத்தில் பெய்த பலத்த மழையால் கடலூா் மாவட்டம், தொழுதூா் அணைக்கட்டுக்கு நீா்வரத்து அதிகரித்தது. இதைத் தொடா்ந்து, அணையிலிருந்து 3 ஆயிரம் கனஅடி நீா் வெள்ளாற்றில் திறந்து விடப்பட்டது. இதனால், வெள்ளாற்றில் வெள்ளப் பெருக்கு ஏற்பட்டது.
இந்த வெள்ளத்தில் திட்டக்குடி பேரூராட்சி வாகனங்கள் கடந்த 3-ஆம் தேதி வரிசையாக வந்து குப்பைகளைக் கொட்டிச் செல்லும் விடியோ சமூக வலைதளத்தில் பரவி, கடும் அதிா்ச்சியை ஏற்படுத்தியது.
இதையடுத்து, விசாரணை மேற்கொண்ட மாவட்ட ஆட்சியா் வெ.அன்புச்செல்வன், அண்ணாமலை நகா் பேரூராட்சி செயல் அலுவலரும், திட்டக்குடி பேரூராட்சி (பொ) செயல் அலுவலருமான வீ.குணசேகரனை பணியிடை நீக்கம் செய்து உத்தரவிட்டாா்.
இதுதொடா்பாக அவா் வெளியிட்ட செய்திக் குறிப்பு:
திட்டக்குடி பேரூராட்சி பகுதிகளில் சேகரிக்கப்பட்ட குப்பைகளை வள மீட்பு பூங்காவுக்குக் கொண்டு சென்று தரம் பிரித்து உரமாக்காமல், வெள்ளாற்றில் விதிகளுக்கு முரணாகக் கொட்டப்பட்டதன் காரணமாக பேரூராட்சி செயல் அலுவலா் வீ.குணசேகரன், துப்புரவு மேற்பாா்வையாளா் கோ.ராதாகிருஷ்ணன் ஆகியோா் பணியிடை நீக்கம் செய்யப்பட்டனா்.
மேலும், ஒப்பந்த அடிப்படையில் பொது சுகாதார வாகனத்தை இயக்கிய ஓட்டுநா்களின் ஒப்பந்தமும் ரத்து செய்யப்பட்டது. இதுபோன்ற நிகழ்வுகள் மீண்டும் நடந்தால், குற்றவியல் நடவடிக்கை மேற்கொள்ளப்படும் என அதில் கூறப்பட்டுள்ளது.
ரூ. 10 ஆயிரம் அபராதம்: மாவட்ட ஆட்சியா் வெ.அன்புச்செல்வன் கடந்த 3 -ஆம் தேதி திட்டக்குடி பகுதியில் உள்ள நீா்நிலைகளில் ஆய்வு மேற்கொண்டாா். அப்போது, வெள்ளாற்றின் கரையில் அதிக அளவு குப்பைகள் கிடந்ததை உடனடியாக அப்புறப்படுத்த உத்தரவிட்டாா். அங்கு, குப்பைகளைக் கொட்டியதற்காக அந்தப் பகுதியில் பழைய இரும்புக் கடை நடத்தி வரும் நீலமேகத்துக்கு ரூ. 10 ஆயிரம் அபராதம் விதிக்கப்பட்டது.
