தருமபுரம் ஆதீன குருமகா சந்நிதானத்தின் திருமேனி நல்லடக்கம்

தருமபுரம் ஆதீன குருமகா சந்நிதானத்தின் திருமேனி ஊர்வலம் மற்றும் நல்லடக்கம் தருமபுரத்தில் வியாழக்கிழமை மாலை நடைபெற்றது.  

தருமபுரம் ஆதீனம் 26-ஆவது குருமகா சந்நிதானம் ஶ்ரீலஶ்ரீ சண்முக தேசிக ஞானசம்பந்த பரமாசார்ய சுவாமிகள் புதன்கிழமை பகல் 3 மணி அளவில் முக்தியடைந்தார். சிறப்பு வழிபாடுகளுக்குப் பின்னர், அவரது திருமேனி புதன்கிழமை மாலை 6 மணி முதல் பக்தர்களின் தரிசனத்துக்காக தருமபுரம் ஆதீனத்தில் வைக்கப்பட்டிருந்தது.  

மதுரை, திருவாவடுதுறை, திருப்பனந்தாள், துழாவூர், குன்றக்குடி, திருப்புகலூர் உள்பட பல்வேறு ஆதீனங்களின் குருமகா சந்நிதானங்கள் பங்கேற்று, மலர்தூவி மரியாதை செலுத்தினர். 

வியாழக்கிழமை மாலை 4 மணிக்கு குருமகா சந்நிதானத்தின் திருமேனியின் குருமூர்த்த பிரவேசம் தொடங்கியது. அலங்கரிக்கப்பட்ட பல்லக்கில் ஆதீனத்தின் 4 மாட வீதிகளில் வலம் வந்த திருமேனி ஊர்வலம் ஆதீன வளாகத்தில் உள்ள மேலகுருமூர்த்தத்தில் நிறைவடைந்தது.

இதையடுத்து, வேதமந்திர முழக்கங்களுடன், குருமகா சந்நிதானத்தின் திருமேனி குருமூர்த்தத்துக்குள் பிரவேசமானது.  பல்வேறு வகையான சிறப்பு வழிபாடுகளுக்குப் பின்னர்,  ஆனந்தபரவசர் பூங்காவில் 24 -ஆவது குருமகா சந்நிதானத்தின் சமாதி திருக்கோயிலுக்கு அருகே 26-ஆவது குருமகா சந்நிதானத்தின் திருமேனி நல்லடக்கம் செய்யப்பட்டது. 

தமிழகத்தின் பல்வேறு பகுதிகளிலும் உள்ள சைவ ஆதீனங்களின் குருமகா சந்நிதானங்கள், தம்பிரான் சுவாமிகள், பிரமுகர்கள்,  ஆன்மிகப் பற்றாளர்கள் இந்த நிகழ்ச்சியில் பங்கேற்றனர்.