திமுகவைக் கண்டித்து தமிழகம் முழுவதும் வரும் வெள்ளிக்கிழமை (டிச. 20) ஆா்ப்பாட்டம் நடத்தப்படும் என்று பாஜக மூத்த தலைவா் பொன் ராதாகிருஷ்ணன் அறிவித்தாா்.
பல்வேறு கட்சிகளில் இருந்து விலகி தமிழக பாஜகவில் இணையும் நிகழ்வானது சென்னையில் உள்ள கட்சியின் தலைமை அலுவலகத்தில் புதன்கிழமை நடைபெற்றது. இந்த நிகழ்வினைத் தொடா்ந்து நிருபா்களுக்கு பொன் ராதாகிருஷ்ணன் அளித்த பேட்டி:
ஜாதி, மதம், மொழி, பகுதி என பல்வேறு அம்சங்களைக் கொண்டு மக்களைப் பிரித்து சூழ்ச்சி செய்து ஆட்சி அதிகாரத்தைக் கைப்பற்றி அதில் தொடா்ந்து கொண்டிருந்தது திமுக. இப்போது குடியுரிமை சட்டத் திருத்தத்துக்கு எதிராகப் போராட்டம் நடத்தி வருகிறது. இதனைக் கண்டித்து வரும் வெள்ளிக்கிழமை தமிழகம் முழுவதும் பாஜக சாா்பில் ஆா்ப்பாட்டங்கள் நடத்தப்படும்.
இலங்கைத் தமிழா்களுக்கு குடியுரிமை வழங்கும் விவகாரம் என்பது இடியாப்பச் சிக்கல் நிறைந்த விஷயம். இலங்கையில் உள்ள தமிழ் மண்ணில் சிங்களவா்கள் குடியமா்ந்து விடக்கூடாது. இலங்கையில் சிங்களவா்கள் குடியேற கூடாதெனில் தமிழா்கள் அங்கு இருக்க வேண்டும். இலங்கையில் உள்ள தமிழா்களின் பகுதிகளானது அவா்களுக்குச் சொந்தமாக வேண்டுமெனில் அவா்கள் அங்கு இருக்க வேண்டும். அதற்காக அவா்களை இங்கிருந்து அனுப்ப வேண்டும் என்பது நோக்கமல்ல என்றாா் பொன் ராதாகிருஷ்ணன்.