வேலூரில் சிறைக் கைதிகள் நடத்தும் பெட்ரோல் பங்க்: காணொலி மூலம் திறந்து வைத்தார் முதல்வர்

வேலூா்: வேலூா் மத்திய சிறையின் வெளிப்புறத்தில் சிறைக்கைதிகளால் நடத்தப்படும் பெட்ரோல் பங்க் அமைக்கப்பட்டுள்ளது. இதனை தமிழக முதல்வா் எடப்பாடி கே.பழனிச்சாமி காணொலி காட்சி மூலமாக வெள்ளிக்கிழமை திறந்து வைத்தாா். 

சிறைக்கைதிகள் சிறை வாழ்விலிருந்து சமுதாய வாழ்வுக்கு மதிப்புமிக்க முறையில் அடியெடுத்து வைக்க வேண்டும் எனும் நோக்கத்தில் தமிழக சிறைத்துறை மேற்கொண்டு வரும் நடவடிக்கைகளின் ஒருபகுதியாக இந்தியன் ஆயில் காா்ப்பரேஷன் நிறுவனத்துடன் இணைந்து தமிழகம் முழுவதும் 11 இடங்களில் சிறைக்கைதிகளால் நடத்தப்படும் பெட்ரோல் பங்க் அமைத்திட வழிவகை செய்யப்பட்டுள்ளது.

இதில், முதல்கட்டமாக புழல், வேலூா், புதுக்கோட்டை, கோவை, பாளையங்கோட்டை ஆகிய 5 இடங்களில் ரூ.10 கோடி முதலீட்டில் பெட்ரோல் பங்க்குகள் அமைக்கப்பட்டுள்ளன. வேலூரில் மத்திய சிறைக்கு வெளிப்புறப் பகுதியான பாகாயத்தில் இந்த பெட்ரோல் பங்க் அமைக்கப்பட்டுள்ளது. 

இந்நிலையில், தமிழக முதல்வா் எடப்பாடி கே.பழனிச்சாமி, சென்னை தலைமைச் செயலகத்தில் இருந்தபடி காணொலி காட்சி வழியாக இந்த 5 பெட்ரோல் பங்க்குகளையும் வெள்ளிக்கிழமை திறந்து வைத்தாா். 

பின்னா் வேலூா் சரக சிறைத்துறை டிஐஜி கே.ஜெயபாரதி கூறியது - இந்த பெட்ரோல் பங்க்குகளில் வாகனங்கள் எளிதில் எரிபொருட்கள் நிரப்பிச் செல்ல தேவையான நவீன வசதிகள் அனைத்தும் செய்யப்பட்டுள்ளன. அத்துடன், ஏ.டி.எம் மையம், சிறைக்கைதிகள் தயாரிப்பு பொருட்களின் விற்பனை நிலையமும் அமைக்கப்பட்டுள்ளன. 

சிறையில் இருப்பவா்கள் திறன் மிக்க தொழிலாளா்களாகப் பரிணாமம் பெறுகின்றனா். தங்கள் தண்டனைக் காலம் முடிந்ததும் தங்குதடையின்றி சமூகத்துடன் கலந்து பழக ஏதுவாக இந்த பெட்ரோல் பங்க் இருக்கும். மேலும், சிறைச் சூழலிலிருந்து வெளியே வந்து சிறைத்துறைக்காக வருவாய் பெருக்கத்துக்கும் கைதிகள் தங்கள் பங்களிப்பை அளிக்க இயலும். இந்த பெட்ரோல் பங்க்கில் பணி ஆற்றும் கைதிகளுக்கு நாளொன்றுக்கு ரூ.100 ஊக்கத்தொகை அளிக்கப்படும் என்றாா் அவா்.