சென்னை: சென்னை மெட்ரோபாலிடன் டெவலப்மெண்ட் கழகத்தின் மூத்த அதிகாரி ஒருவர், தனக்குக் கீழ் பணியாற்றும் இளநிலை பெண் ஊழியருக்கு பாலியல் தொந்தரவு கொடுத்திருப்பது வெளிச்சத்துக்கு வந்துள்ளது.
மூத்த அதிகாரியின் தொந்தரவால் சிஎம்டிஏ-வில் பணியாற்றி வந்த அந்தப் பெண் தனது வேலையை ராஜினாமா செய்துவிட்டு வெளியேறியுள்ளார்.
தற்போது, அந்த முன்னாள் பெண் ஊழியருக்கும், மூத்த அதிகாரிக்கும் நடந்த வாட்ஸ்அப் சாட் மெசேஜ்கள் சமூக வலைத்தளங்களில் பரவியதை அடுத்து, இது குறித்து விசாரணை நடத்த சிஎம்டிஏ உத்தரவிட்டுள்ளது.
பணி உத்திரவாதம் மற்றும் பல்வேறு சலுகைகளைப் பெற வேண்டும் என்றால், தனது ஆசைக்கு இணங்கும்படி, மூத்த அதிகாரி, அப்பெண்ணுக்கு நேரடியாகவும், மறைமுகமாகவும் வலியுறுத்தும் வகையில் அந்த வாட்ஸ் அப் பதிவுகள் இடம்பெற்றுள்ளன.
இது குறித்து கருத்துக் கூறியிருக்கும் சிஎம்டிஏ அதிகாரி ஒருவர், அந்த வாட்ஸ்அப் செய்தியில், SP Sir cmda என்று மட்டுமே உள்ளது. அதில் அதிகாரியின் பெயரோ செல்போன் எண்ணோ இடம்பெறவில்லை. பாதிப்புக்குள்ளான பெண் பணியை ராஜினாமா செய்துவிட்டு, செல்போன் எண்ணையும் மாற்றியுள்ளார். எனவே அப்பெண்ணின் அடையாளமும் வெளியாகாமல், குற்றவாளியைக் கண்டுபிடிக்கும் வகையில் விசாரணை முடுக்கிவிடப்பட்டுள்ளதாகக் கூறுகிறார்.
இது பற்றி வெளியாகும் சில தகவல்களில், அதே குறிப்பிட்ட நபரால், இதுபோன்ற வேறு சில சம்பவங்களும் நடந்திருப்பதாவும், மற்றொரு பெண் ஊழியரும் பாதிக்கப்பட்டிருப்பதாகவும் தெரிய வந்துள்ளது.
பல இடங்களில் பெண்களுக்கு இதுபோன்ற பாலியல் சீண்டல்கள் நடந்து கொண்டுதான் இருக்கிறது. அதில் இதுவும் ஒரு வகை. வாட்ஸ்அப் மெசேஜோடு வெளியாகியிருப்பதால் நிச்சயம் குற்றவாளி அடையாளம் காணப்படலாம், தண்டிக்கப்படலாம் என்று நம்புவோம்.