டார்ச் லைட் ஒளி ஒரு குறிப்பிட்ட தூரம் தான் செல்லும் என தமிழக மீன்வளத்துறை அமைச்சர் ஜெயகுமார் தெரிவித்துள்ளார்.
மக்களவைத் தேர்தல் மற்றும் காலியாக உள்ள சட்டப்பேரவைத் தொகுதிகளுக்கான இடைத் தேர்தலை தலைமை தேர்தல் ஆணையம் அறிவித்துள்ளது. அதன்படி, தமிழகத்தில் மக்களவைத் தேர்தலுக்கான வாக்குப்பதிவு, வாக்கு எண்ணிக்கையோடு இடைத் தேர்தல் வாக்குப் பதிவு, வாக்கு எண்ணிக்கையும் சேர்த்து நடத்தப்படும்.
அதே நேரம், தமிழகத்தில் காலியாக உள்ள 21 சட்டப்பேரவைத் தொகுதிகளில், திருப்பரங்குன்றம், ஒட்டப்பிடாரம், அரவக்குறிச்சி ஆகிய 3 சட்டப்பேரவைத் தொகுதிகள் தவிர, மீதமுள்ள 18 தொகுதிகளுக்கு மட்டுமே இப்போது இடைத்தேர்தல் நடத்தப்பட உள்ளது.
இதனிடையே, தேர்தல் ஆணையத்தில் பதிவு செய்துள்ள ஆனால் அங்கீகாரம் பெறாத 39 கட்சிகளுக்கான சின்னங்களை ஒதுக்கீடு செய்து அறிவித்தது தேர்தல் ஆணையம். அதில், கமல்ஹாசனின் மக்கள் நீதி மய்யம் கட்சிக்கு, 'பேட்டரி டார்ச் லைட்' சின்னத்தை தேர்தல் ஆணையம் ஒதுக்கியுள்ள நிலையில், தீமைகளைத் தேடிக் கண்டுபிடிக்கும் பெரும் முனைப்போடு தொடங்கப்பட்ட கட்சிக்கு, இது மிகவும் பொருத்தமான சின்னமாக எங்களுக்குத் தோன்றுகிறது. தமிழகத்துக்கும் இந்தியாவுக்கும் ஒளிதரும் புதிய விளக்காய் இன்று முதல் ஒளிரும் என்றார் கமல்ஹாசன்.
டார்ச் சின்னத்தை வைத்தாவது கட்சியைக் கண்டுபிடிக்கட்டும் என அமைச்சர் பொன்.ராதாகிருஷ்ணன் கூறிய கருத்துக்கு, நோட்டாவில் கண்ணுக்குத் தெரியாமல் இருக்கும் பாஜகவை தேடித்தான் கண்டுபிடிக்க வேண்டும். அதற்கு இந்த டார்ச் பயன்படும். இதை வைத்து அவர்கள் எங்கு இருக்கிறார்கள் என்று தேடிப்பார்க்க வேண்டும் என கமலஹாசன் பதிலளித்திருந்தார்.
இந்நிலையில், கவுரவர்களை வீழ்த்தி வெற்றி பெற பாண்டவர்களாகிய நாங்கள் மக்களவைத் தேர்தலுக்கு தயாராகிவிட்டோம். மக்களவைத் தேர்தலோடு, சட்டப்பேரவைக்கு தேர்தல் நடத்தினாலும் நாங்கள் தயாராக உள்ளோம்.
21,40 என அனைத்திலும் மகத்தான் வெற்றி பெறுவோம்.
அதிமுக என்பது கலங்கரை விளக்கம் போன்றது. அது உலகுக்கே வெளிச்சம் தரக்கூடியது. ஆனால் 'டார்ச் லைட்'டில் குறிப்பிட்ட அளவு தான் ஒளி செல்லும். குறுகிய மனப்பாங்கையே அது காட்டுகிறது என ஜெயகுமார்.
